കൊണ്ടോട്ടി: സംസ്ഥാനത്തെ മുസ്‌ലിം പള്ളികളില്‍ ജോലി ചെയ്യുന്ന മുദരിസ്, മുഅദ്ദിന്‍ എന്നിവര്‍ക്ക് വഖ്ഫ് ബോര്‍ഡ് സാമൂഹ്യ ക്ഷേമ പദ്ധതിയില്‍ ഉള്‍പ്പെടുത്തി നല്‍കിയിരുന്ന മുല്ല -മുക്രി പെന്‍ഷന്‍ മുടങ്ങിയിട്ട് രണ്ട് വര്‍ഷം. 2018 മാര്‍ച്ചിലാണ് ഇവര്‍ക്ക് അവസാനമായി പെന്‍ഷന്‍  ലഭിച്ചത്.

  2017-18 വര്‍ഷത്തെ ബജറ്റില്‍ ഈയിനത്തില്‍ 1.32 കോടി നീക്കിവച്ചെങ്കിലും 42 ലക്ഷം രൂപ മാത്രമാണ് ചെലവഴിച്ചത്. 2018-19, 2019-20 വര്‍ഷങ്ങളില്‍  ഒന്നര കോടി രൂപ വീതം ബജറ്റില്‍ വകയിരുത്തിയെങ്കിലും ഒരു രൂപ പോലും ചെലവഴിച്ചില്ല.  2019 ല്‍ പെന്‍ഷന്‍ തുക 1,000 രൂപയില്‍ നിന്ന് 1,200 രൂപയായി വര്‍ധിപ്പിച്ചതായി പ്രഖ്യാപിച്ചുവെങ്കിലും അതിന്റെ ആനുകൂല്യവും ഇവര്‍ക്ക് ലഭിച്ചിട്ടില്ല.

  കൊവിഡ് പ്രതിരോധ പ്രവര്‍ത്തനങ്ങളുടെ ഭാഗമായി പള്ളികള്‍ അടച്ചിട്ടതോടെ ഇവര്‍ക്ക് ജോലി ഇല്ലാത്ത അവസ്ഥയാണ്. ലോക്ക് ഡൗണ്‍ പ്രഖ്യാപിച്ച പശ്ചാത്തലത്തില്‍ പല  ക്ഷേമനിധികളും ആനുകൂല്യങ്ങളും പാക്കേജുകളും നടപ്പിലാക്കാന്‍ ശ്രമങ്ങള്‍ തുടങ്ങിക്കഴിഞ്ഞു.എന്നാല്‍ കുറഞ്ഞ വേതനം മാത്രം വാങ്ങുന്ന ഇക്കൂട്ടര്‍ക്ക് ആനുകൂല്യങ്ങളോ പാക്കേജുകളോ ഇതുവരെ പ്രഖ്യാപിക്കപ്പെട്ടില്ല. ജോലിയില്ലാതായതോടെ ഇവര്‍ക്ക്  ജീവിതം മുന്നോട്ടു കൊണ്ടുപോകുവാന്‍ കഴിയാത്ത അവസ്ഥയാണ്. ഇവരുടെ മക്കളുടെ വിവാഹത്തിന് 10,000 രൂപയുടെ സാമ്പത്തിക സഹായം നേരത്തെ നല്‍കിയിരുന്നു. ഇതിന് വേണ്ടി ലഭിച്ച അപേക്ഷകളും കെട്ടിക്കിടക്കുകയാണ്.

   മുദരിസ്,മുഅദ്ദിന്‍ പെന്‍ഷന്‍ കുടിശ്ശിക നിലവിലെ പശ്ചാത്തലത്തില്‍ കൊടുത്തു തീര്‍ക്കണമെന്ന് ആവശ്യപ്പെട്ട് ടി.വി ഇബ്രാഹിം എം.എല്‍.എ. ധനകാര്യ, ന്യൂനപക്ഷ ക്ഷേമ, വഖഫ് കാര്യ വകുപ്പ് മന്ത്രിമാര്‍ക്ക് നിവേദനം നല്‍കിയിട്ടുണ്ട്.