നാഗ്പൂര്‍: വിവാദങ്ങള്‍ക്കിടെ ആര്‍.എസ്.എസ് പരിപാടിയില്‍ പങ്കെടുക്കാന്‍ മുന്‍ രാഷ്ട്രപത്രിയും മുതിര്‍ന്ന കോണ്‍ഗ്രസ് നേതാവുമായ പ്രണബ് മുഖര്‍ജി നാഗ്പൂരിലെത്തി.
ഇന്നലെ വൈകുന്നേരം അഞ്ച് മണിയോടെ നാഗ്പൂര്‍ എയര്‍പോര്‍ട്ടില്‍ എത്തിയ പ്രണബ് മുഖര്‍ജിക്ക് ആര്‍.എസ്.എസ് പ്രവര്‍ത്തകര്‍ ഉഗ്രന്‍ സ്വീകരണമാണ് ഒരുക്കിയത്.ആര്‍.എസ്.എസിന്റെ തൃതീയ വര്‍ഷ സംഘ് ശിക്ഷാ വര്‍ഗിന്റെ ഇന്ന് നടക്കുന്ന സമാപന സമ്മേളനത്തില്‍ പങ്കെടുക്കാനാണ് പ്രണബ് എത്തിയത്. ആര്‍.എസ്.എസ് ആസ്ഥാനത്ത് എല്ലാ വര്‍ഷവും നടക്കുന്ന ചടങ്ങാണ് ത്രിതീയ വര്‍ഷ സംഘ ശിക്ഷ വര്‍ഗ്.
800 ഓളം പേരെയാണ് പ്രണബ് മുഖര്‍ജി അഭിസംബോധന ചെയ്യുക. കോണ്‍ഗ്രസിലെ ഏറ്റവും മുതിര്‍ന്ന നേതാവ് കൂടിയായ പ്രണബ് മുഖര്‍ജി ആര്‍.എസ്.എസ് പരിപാടിയില്‍ പങ്കെടുക്കുന്നുവെന്ന വാര്‍ത്ത വലിയ വിവാദത്തിന് വഴിവച്ചിരുന്നു.
അതേസമയം തനിക്കെന്താണോ പറയാനുള്ളത് അത് നാഗ്പൂരില്‍ പറയുമെന്ന് പ്രണബ് മുഖര്‍ജി വ്യക്തമാക്കിയിരുന്നു. ചടങ്ങില്‍ ആര്‍.എസ്.എസിന്റെ സര്‍സംഘചാലക് മോഹന്‍ ഭാഗവത് അധ്യക്ഷത വഹിക്കും.