നാദാപുരം: വീടാക്രമിച്ചതായി യുവതി പരാതിപ്പെട്ടതിനെ തുടര്‍ന്ന് മൂന്നുപേര്‍ അറസ്റ്റിലായി. സമീപവാസികളായ ഇവരെ കോടതി റിമാന്‍ഡ് ചെയ്തു. കഴിഞ്ഞ ദിവസം രാത്രി കസ്തൂരിക്കുളം പെട്രോള്‍ പമ്പിന് സമീപത്താണ് കേസിനാസ്പദമായ സംഭവം. യുവതിയുടെ വീട്ടിലെ നിത്യസന്ദര്‍ശകനെന്നു പറയപ്പെടുന്ന പേരോട് സ്വദേശിയായ ഒരു യുവാവിനെ നാട്ടുകാര്‍ അര്‍ധരാത്രി വീട്ടില്‍വച്ചു കൈയോടെ പിടികൂടിയിരുന്നു.
എന്നാല്‍ യുവതിയും യുവാവും അപേക്ഷിച്ചതിനെ തുടര്‍ന്നു നാട്ടുകാര്‍ ഇവരെ വിട്ടയച്ചെങ്കിലും പിറ്റേ ദിവസം യുവതി പൊലിസില്‍ പരാതിപ്പെടുകയായിരുന്നു. യുവതിയുടെ പരാതിപ്രകാരം തൊടുവയില്‍ ഷംനാസ്(22 ), തയ്യില്‍ സുലൈമാന്‍ (36), തയ്യില്‍ റംഷിദ്(22) എന്നിവരെയാണ് പൊലിസ് അറസ്റ്റ് ചെയ്തത്. 12 പേര്‍ക്കെതിരേയാണ് യുവതി പരാതി നല്‍കിയത്. വീട്ടുപകരണങ്ങളും മറ്റും കേടുപാട് വരുത്തിയതിന് 8000 രൂപയുടെ നഷ്ടമുണ്ടായതായും പരാതിയില്‍ പറയുന്നു.