പാലക്കാട്: കേരളത്തില്‍ പൂട്ടുന്ന വിദ്യാലയങ്ങളുടെ പിന്നാലെ സര്‍ക്കാര്‍ പോകാതെ ഇനി വിദ്യാലയങ്ങള്‍ പൂട്ടാതിരിക്കാനുള്ള സാഹചര്യം ഒരുക്കുകയാണ് വേണ്ടതെന്ന് കേരള എയ്ഡസ് പ്രൈമറി സ്‌കൂള്‍ മാനേജേഴ്‌സ് അസോസിയേഷന്‍ യോഗം അഭിപ്രായപ്പെട്ടു. വിദ്യാലയങ്ങള്‍ പൂട്ടുന്നതിനുള്ള കാരണം മനസിലാക്കുന്നതിന് മാനേജ്‌മെന്റുമായി ഇതുവരെ സര്‍ക്കാര്‍ ചര്‍ച്ച ചെയ്തിട്ടില്ല. ഒരു കുട്ടിയുണ്ടെങ്കിലും വിദ്യാലയം നടത്തും എന്നുള്ളതില്‍ വിദ്യാലയങ്ങളില്‍ ഒരു കുട്ടിമാത്രം ആകാതെ സംരക്ഷിക്കുകയാണ് വേണ്ടതെന്നും യോഗം നിര്‍ദ്ദേശിച്ചു. ഇനി വിദ്യാലയങ്ങള്‍ പൂട്ടാതിരിക്കാന്‍ സ്‌കൂള്‍ മാനേജര്‍മാരുമായി തുറന്ന ചര്‍ച്ചയ്ക്ക് തയ്യാറാകുകയും, ഏകീകൃത സിലബസ് അംഗീകരിക്കുകയും അധ്യാപകരുടെ രാഷ്ട്രീയം, കച്ചവട പ്രവര്‍ത്തനങ്ങള്‍ എന്നിവ നിറുത്തലാക്കുകയും വേണം. പ്രസിഡന്റ് ശശികുമാര്‍, സുബ്രഹ്മണ്യന്‍ മാസ്റ്റര്‍, ഉമ്മര്‍ ഫാറൂഖ്, അശോകന്‍ എന്നിവര്‍ സംസാരിച്ചു.