കൊണ്ടോട്ടി: കൊവിഡ് -19 മൂലം കേരളം ഉള്‍പ്പടെ ഇന്ത്യയിലെ വിവിധ സംസ്ഥാനങ്ങളില്‍ കുടുങ്ങിയ സഊദി പൗരന്മാരെ കൊണ്ടുപോകാന്‍ ഇന്ന് മൂന്ന് സഊദി എയര്‍ലൈന്‍സ് വിമാനങ്ങള്‍ എത്തുന്നു. കരിപ്പൂര്‍, മുംബൈ, ദില്ലി വിമാനത്താവളങ്ങളിലേക്കാണ് സഊദി എയര്‍ലൈന്‍സ് വിമാനങ്ങള്‍ ഇന്ത്യന്‍ വ്യോമയാന മന്ത്രാലയത്തിന്റെ പ്രത്യക അനുമതിയോടെ സര്‍വിസ് നടത്തുന്നത്.

   റിയാദില്‍ നിന്ന് ഉച്ചയോടെ കരിപ്പൂരില്‍ എത്തുന്ന സഊദി എയര്‍ലൈന്‍സ് വിമാനം 140 സഊദി പൗരന്മാരുമായി ബംഗളൂരുവിലേക്ക് പോകും.ഇവിടെ നിന്നും 130 സഊദി പൗരന്മാരെ കയറ്റി വിമാനം റിയാദിലേക്ക് പറക്കും. മറ്റു രണ്ടു വിമാനങ്ങള്‍ മുംബൈ,ദില്ലി വിമാനത്താവളങ്ങളിലാണ് ഇറങ്ങുക. ഇവിടെ നിന്ന് മറ്റു സംസ്ഥാനങ്ങളിലും കുടുങ്ങിയവരെ എത്തിച്ച് കൊണ്ടുപോകും.  കേരളത്തില്‍ ചികിത്സക്കും മറ്റുമായി എത്തിയ സഊദി പൗരന്മാരാണ് ലോക്ഡൗണ്‍ മൂലം കുടുങ്ങിയിരിക്കുന്നത്.