തിരുവനന്തപുരം: തുല്യ അവസരങ്ങള്‍ ഉണ്ടായാല്‍ മാത്രമേ സ്ത്രീ ശാക്തീകരണവും സംരംഭകത്വ വികസനവും സാധ്യമാകുകയുള്ളൂവെന്ന് ഗവര്‍ണര്‍ ജസ്റ്റിസ് പി. സദാശിവം. പുരോഗമന സമൂഹത്തിലെ പരിവര്‍ത്തനങ്ങളാണു കേരളത്തിലെ സ്ത്രീകളുടെ പുരോഗതിയുടെ പ്രധാന അടിസ്ഥാനം. അടുക്കളയില്‍നിന്ന് സ്ത്രീകളെ മുഖ്യധാരയിലേക്കെത്തിക്കാന്‍ വിദ്യാഭ്യാസം വളരെയധികം പങ്കുവഹിച്ചിട്ടുണ്ട്. സ്ത്രീകളുടെ സാക്ഷരതയിലുണ്ടായ വര്‍ധനവ് സമൂഹത്തിന്റെ മൊത്തം പുരോഗതിയിലേക്കു തന്നെ നയിച്ചു. ഒരു സ്ത്രീയെ വിദ്യാസമ്പന്നയാക്കുമ്പോള്‍ അതു കുടുംബത്തെയൊന്നാകെ വിദ്യാഭ്യാസത്തിലെത്തിക്കുമെന്നും ഗവര്‍ണര്‍ പറഞ്ഞു. അന്താരാഷ്ട്ര വനിതാ വാരാചരണത്തിന്റെ സംസ്ഥാനതല ഉദ്ഘാടനവും വനിതാ വികസന കോര്‍പറേഷന്റെ നേതൃത്വത്തില്‍ സംഘടിപ്പിച്ച വനിതാ സംരംഭകരുടെ കൂട്ടായ്മയായ നവാംഗനയുടെയും ഉദ്ഘാടനം ജഗതി ജവഹര്‍ സഹകരണ ഓഡിറ്റോറിയത്തില്‍ നിര്‍വഹിച്ച് സംസാരിക്കുകയായിരുന്നു ഗവര്‍ണര്‍.
മന്ത്രി കെ.കെ ശൈലജ അധ്യക്ഷയായി. കെ. മുരളീധരന്‍ എം.എല്‍.എ മുഖ്യാതിഥിയായി. ബിജു പ്രഭാകര്‍, ഷീബ ജോര്‍ജ്, കെ.എസ് സലീഖ, ബിന്ദു വി.സി സംസാരിച്ചു. യുവസംരംഭക തിര്‍ത്ഥ നിര്‍മ്മലിനെ ഗവര്‍ണറും മന്ത്രിയും അഭിനന്ദിച്ചു.