ചെര്‍ക്കള: കഴിഞ്ഞ സാമ്പത്തിക വര്‍ഷത്തിലെ പദ്ധതി നിര്‍വഹണത്തില്‍ ചെങ്കള പഞ്ചായത്തിനു മികച്ച നേട്ടം കൈവരിക്കാന്‍ സാധിച്ചതിനു പിന്നില്‍ ജനപ്രതിനിധികളുടെയും ഉദ്യോഗസ്ഥരുടെയും കൂട്ടായ പരിശ്രമമെന്ന് പഞ്ചായത്ത് പ്രസിഡന്റ് ഷാഹിനാ സലിം. പഞ്ചായത്ത് നടപ്പാക്കുന്ന എല്ലാ  പദ്ധതികളും ഭരണ പ്രതിപക്ഷ അംഗങ്ങളുടെ ഒത്തൊരുമിച്ചുള്ള പ്രവര്‍ത്തനം കൊണ്ട് എല്ലാ പരിമിതികളെയും മറികടന്നു സമയബന്ധിതമായി പൂര്‍ത്തിയാക്കാന്‍ സാധിച്ചു. ചെര്‍ക്കള ടൗണിലെ റോഡരികില്‍ മാലിന്യം തള്ളുന്നതു തടയാന്‍ സി.സി.ടി.വി കാമറ സ്ഥാപിക്കുകയും എസ്.സി എസ്.ടി വിഭാഗങ്ങള്‍ക്കു ചെലവഴിക്കേണ്ട ഫണ്ട് മുന്‍കാലങ്ങളെ അപേക്ഷിച്ച് 85 ശതമാനത്തോളം ചെലവഴിക്കാന്‍ സാധിച്ചതും മികച്ച നേട്ടമായി.
പശ്ചാത്തല മേഖലയിലും റോഡ് വികസനത്തിനും വലിയ തോതിലുള്ള ഊന്നല്‍ നല്‍കാനായി. മാലിന്യ സംസ്‌കരണ മേഖലയാണു പ്രശ്‌നമായി മുന്നിലുള്ളത്. ഇതിനും അര്‍ഹമായ പരിഗണന നല്‍കും. അടുത്ത വര്‍ഷത്തിലേക്കുള്ള പദ്ധതികള്‍ രൂപപ്പെടുത്തി തുടങ്ങിയിട്ടുണ്ട്.