ദമാം: സമസ്‌ത ഇസ്‌ലാമിക് സെന്റർ സഊദി നാഷണൽ കമ്മിറ്റി “പവിത്ര മാസം പരീക്ഷണങ്ങൾക്കു പരിഹാരം” എന്ന പ്രമേയത്തിൽ നടത്തുന്ന ക്യാമ്പയിനിന്റെ ഭാഗമായി ദമാം സെൻട്രൽ കമ്മിറ്റി ഖുർആൻ പാരായണ മത്സരം സംഘടിപ്പിച്ചു. സബ്‌ജൂനിയർ, ജൂനിയർ, സീനിയർ, ജനറൽ, ഉലമ എന്നിങ്ങനെ അഞ്ചു വിഭാഗങ്ങളിലായാണ് ഓൺലൈൻ സംവിധാനം വഴി മത്സരങ്ങൾ നടന്നത്. വ്യത്യസ്‍ത മേഖലകളിൽ നിന്നും 50 തിലധികം ആളുകൾ രജിസ്റ്റർ ചെയ്ത മത്സരത്തിൽ സമസ്‌ത ഖാരിഉം പ്രമുഖ പണ്ഡിതനുമായ ശരീഫ് റഹ്മാനിയുടെ നേതൃത്വത്തിലുള്ള നാലംഗ ജൂറി സമിതിയാണ് മത്സരങ്ങൾ വിലയിരുത്തിയത്.

   സബ് ജൂനിയർ വിഭാഗത്തിൽ യഥാക്രമം മിദ്‌ലാജ്, മിസ്ഹബ്, അദ്‌നാൻ മുഹമ്മദ്, അബ്ദുൽ ഖാദർ എന്നിവരും ജൂനിയർ വിഭാഗത്തിൽ മുഹമ്മദ് കൈഫ്, ബിൻഷാദ്, ഷെജിൽ , മിഷാൽ എന്നിവരും സീനിയർ വിഭാഗത്തിൽ നബീൽ, ഷിനാസ് എന്നിവരും ജനറൽ വിഭാഗത്തിൽ ഫൈസൽ ഇരിക്കൂർ മുത്വലിബ് , ഷാഹുൽ ഹമീദ് എന്നിവരും ഉലമാ വിഭാഗത്തിൽ ഉബൈദ് ഹുദവി, ബഷീർ ബാഖവി, ഉമർ ഹസനി എന്നിവരും യഥാക്രമം വിജയികളായി. മേഖലാ തല മത്സരങ്ങിൽ ഒന്നും രണ്ടും സ്ഥാനം ലഭിക്കുന്നവരാണ് മെയ് 15, 16 തിയ്യതികളിൽ നടക്കുന്ന എസ് ഐ സി സഊദി ദേശീയ തല ഖുർആൻ പാരായണ മത്സരത്തിൽ മാറ്റുരക്കുക. മത്സരാർഥികളെയും വിജയികളേയും സമസ്‌ത ഇസ്‌ലാമിക് സെന്റർ നേതാക്കൾ അഭിനന്ദിച്ചു.