കൊച്ചി: ഹര്‍ത്താലുകള്‍ ആഹ്വാനം ചെയ്തവര്‍ക്കെതിരേ കേസെടുക്കണമെന്നാവശ്യപ്പെട്ട് ഡി.ജി.പി ലോക്‌നാഥ് ബെഹ്‌റ പുറത്തിറക്കിയ സര്‍ക്കുലര്‍ ഹൈക്കോടതി ഉത്തരവിന് വിരുദ്ധമെന്ന് യൂത്ത് കോണ്‍ഗ്രസ് സംസ്ഥാന പ്രസിഡന്റ് ഡീന്‍ കുര്യാക്കോസ്.
പെരിയ ഇരട്ടക്കൊലപാതകത്തില്‍ പ്രതിഷേധിച്ച് ഹര്‍ത്താല്‍ ആഹ്വാനം ചെയ്തവര്‍ക്കെതിരേ കേസെടുക്കാന്‍ 22ലെ ഹൈക്കോടതി ഉത്തരവ് ആവശ്യപ്പെട്ടിട്ടില്ല. എന്നാല്‍, ഡയരക്ടര്‍ ജനറല്‍ ഓഫ് പ്രോസിക്യൂഷന്‍ നേതാക്കള്‍ക്കെതിരേ കേസെടുക്കാമെന്ന് ഡി.ജി.പിക്ക് നിയമോപദേശം നല്‍കിയിരിക്കുകയാണ്.
സി.പി.എം പ്രവര്‍ത്തകന്റെ പരാതിയെ തുടര്‍ന്നാണ് ഡി.ജി.പി നിയമോപദേശം തേടിയത്. നിയമോപദേശത്തിന്റെ അടിസ്ഥാനത്തില്‍ ഹര്‍ത്താല്‍ ആഹ്വാനം ചെയ്തവര്‍ക്കെതിരേ കേസെടുക്കാന്‍ പൊലിസ് സ്റ്റേഷനുകള്‍ക്ക് നിര്‍ദേശം നല്‍കിക്കൊണ്ട് ഡി.ജി.പി സര്‍ക്കുലറും പുറത്തിറക്കി. ഇതേതുടര്‍ന്ന് തനിക്കെതിരേ ചില പൊലിസ് സ്റ്റേഷനുകളില്‍ കേസ് രജിസ്റ്റര്‍ ചെയ്തുകഴിഞ്ഞു. ഇത് നിയമവിരുദ്ധമാണ്. കോടതി ഉത്തരവിന് വിരുദ്ധമായി കേസെടുക്കാനുള്ള സി.പി.എം തീരുമാനം രാഷ്ട്രീയ പകപോക്കലാണെന്നും അദ്ദേഹം പറഞ്ഞു.