ലണ്ടന്‍: പ്രിന്‍സ് രാജകുമാരന്റെ പ്രഥമ പശ്ചിമേഷ്യന്‍ സന്ദര്‍ശനത്തിനു തുടക്കം. അഞ്ചു ദിവസം നീണ്ടുനില്‍ക്കുന്ന ചരിത്രപരമായ പര്യടനത്തില്‍ ഇസ്‌റാഈല്‍, ഫലസ്തീന്‍ പ്രദേശങ്ങളും രാജകുമാരന്‍ സന്ദര്‍ശിക്കുന്നുണ്ട്. ലണ്ടനില്‍നിന്നു യാത്ര തിരിച്ച കേംബ്രിജ് പ്രഭു കൂടിയായ വില്യം ആദ്യം ജോര്‍ദാനിലാണെത്തിയത്. ഇവിടെ ജോര്‍ദാന്‍ രാജാവ് ഹുസൈന്‍ ബിന്‍ അബ്ദുല്ല രണ്ടാമനുമായി കൂടിക്കാഴ്ച നടത്തി.
ഇസ്‌റാഈല്‍ രൂപീകരണത്തിന്റെ 70-ാം വാര്‍ഷികത്തിന്റെയും ഇസ്‌റാഈല്‍-ഫലസ്തീന്‍ സംഘര്‍ഷത്തിന്റെയും ഇടയിലാണു രാജകുമാരന്റെ സന്ദര്‍ശനമെന്നതു പര്യടനത്തിന്റെ പ്രസക്തി വര്‍ധിപ്പിക്കുന്നു. ഇസ്‌റാഈല്‍ പ്രധാനമന്ത്രി ബിന്‍യാമീന്‍ നെതന്യാഹു, ഫലസ്തീന്‍ അതോറിറ്റി പ്രസിഡന്റ് മഹ്മൂദ് അബ്ബാസ് എന്നിവരുമായി അദ്ദേഹം കൂടിക്കാഴ്ച നടത്തുന്നുണ്ട്. റാമല്ലയില്‍ എത്തിയാണ് അബ്ബാസിനെ കാണുക. കൂടിക്കാഴ്ചയില്‍ കുടിയേറ്റ സമുദായങ്ങളുടെ പ്രശ്‌നങ്ങള്‍ ചര്‍ച്ച ചെയ്യുമെന്നാണ് കെന്‍സിങ്ടണ്‍ കൊട്ടാരം വക്താവ് അറിയിച്ചത്.
ഇസ്‌റാഈല്‍ സന്ദര്‍ശനത്തിനിടെ ലോക ഹോളോകോസ്റ്റ് അനുസ്മരണ കേന്ദ്രം വില്യം സന്ദര്‍ശിക്കും. ഇവിടെ ഹോളോകോസ്റ്റ് ഇരകളുടെ ചാരം അടക്കം ചെയ്ത സ്ഥലത്ത് അദ്ദേഹം റീത്ത് സമര്‍പ്പിക്കും. ജറൂസലമിലെ പഴയ നഗരവും അദ്ദേഹം സന്ദര്‍ശിക്കും.