രാമനാഥപുരം: രാമേശ്വരത്തെ തങ്കച്ചിമഠത്തുനിന്ന് വന്‍തോതില്‍ വെടിക്കോപ്പുകളും സ്‌ഫോടക വസ്തുക്കളും പൊലിസ് കണ്ടെടുത്തു.

എല്‍ടിടിഇ ഉപയോഗിച്ചതെന്നു കരുതുന്ന വസ്തുക്കളാണ് കണ്ടെടുത്തതെന്ന് പൊലിസ് പറഞ്ഞു.

സ്‌ഫോടക വസ്തുക്കള്‍ക്ക് വര്‍ഷങ്ങള്‍ പഴക്കമുണ്ട്.

അന്തോണിയാര്‍പുരം സ്വദേശി സെപ്റ്റിക് ടാങ്കിനുവേണ്ടി നിലം കുഴിച്ചപ്പോഴാണ് ഒരു പെട്ടി നിറയെ വെടിയുണ്ടകള്‍ ലഭിച്ചത്.

ഉടന്‍ തന്നെ ഇയാള്‍ പൊലിസിനെ വിവരം അറിയിക്കുകയായിരുന്നു.

തുടര്‍ന്നു പൊലിസ് നടത്തിയ തിരച്ചിലിലാണ് 50 പെട്ടികളിലായി സ്‌ഫോടകവസ്തുക്കളും വെടിക്കോപ്പുകളും കുഴിച്ചിട്ട നിലയില്‍ കണ്ടെത്തിയത്.

ശ്രീലങ്കയില്‍ തമിഴ് രാജ്യത്തിനു വേണ്ടി പോരാടിയിരുന്ന ലിബറേഷന്‍ ടൈഗേഴ്‌സ് ഓഫ് തമിഴ് ഈല( എല്‍ടിടിഇ)ത്തിന്റെ പ്രധാന താവളമായിരുന്നു രാമേശ്വരം.