നാദാപുരം: പൊലിസിനെതിരേ വീട്ടമ്മ നല്‍കിയ പരാതിയില്‍ നഷ്ട പരിഹാരത്തുക കൈമാറി. വീടാക്രമിച്ചു നഷ്ടം വരുത്തിയതിന് കുമ്മങ്കോട്ടെ കോമ്പിയുള്ളതില്‍ താഴക്കുനി പാത്തുട്ടി നല്‍കിയ പരാതിയിലാണ് പൊലിസില്‍ നിന്ന് നഷ്ട പരിഹാരം ഈടാക്കി നല്‍കിയത്.
2015 സെപ്തംബര്‍ ഒന്‍പതിനായിരുന്നു സംഭവം. വാറണ്ട് കേസില്‍ പ്രതിയായ പാത്തുട്ടിയുടെ ഭര്‍ത്താവ് അയ്യൂബിനെ അന്വേഷിച്ചെത്തിയ പൊലിസ് വീടിന്റെ വാതില്‍ ചവിട്ടിപ്പൊളിക്കുകയും തടയാന്‍ ചെന്ന സ്ത്രീകളെ കൈയേറ്റം ചെയ്യുകയുമായിരുന്നു. നാദാപുരം എസ്.ഐ ശ്രീനിവാസന്‍, അഡീഷനല്‍ എസ്.ഐ സുജിത്.
സിവില്‍ ഓഫിസര്‍മാരായ രതീഷ്, വിനോദ് കുമാര്‍ തുടങ്ങിയ പത്ത് പൊലിസുകാരെ പ്രതിചേര്‍ത്ത് പരാതി നല്‍കിയിരുന്നു. തുടര്‍ന്ന് ന്യൂനപക്ഷകമ്മിഷന്‍ പൊലിസിനെതിരെ എടുത്ത കേസിലാണ് സുപ്രധാന വിധി. 2016 ജൂണ്‍ 8ന് കമ്മിഷന്‍ പുറപ്പെടുവിച്ച വിധിയില്‍ എസ്.ഐ ശ്രീനിവാസന്റെ ഭാഗത്ത് നിന്നും നിയമവിരുദ്ധ പ്രവര്‍ത്തനം നടന്നിട്ടുണ്ടെന്നും നഷ്ടപരിഹാരത്തുക പൊലിസില്‍ നിന്ന് പിടിച്ചെടുത്ത്‌നല്‍കണമെന്നും ഉത്തരവ് പുറപ്പെടുവിച്ചിരുന്നു.
കുറ്റക്കാരായ പൊലിസുകാര്‍ക്കെതിരേ വകുപ്പ് തല നടപടി സ്വീകരിക്കാനും ശുപാര്‍ശ നല്‍കി. എന്നാല്‍ ഉത്തരവ് നടപ്പാക്കാന്‍ കൂട്ടാക്കാത്ത പൊലിസ് നടപടിക്കെതിരെ കുടുംബം ഹൈകോടതിയെ സമീപിക്കുകയായിരുന്നു.
കഴിഞ്ഞ ദിവസം വീട്ടിലെത്തിയ പൊലിസ് വടകര എസ്.ബി.ടിയുടെ പേരിലുള്ള ചെക്ക് പാത്തുട്ടിക്ക് കൈമാറി.
നാദാപുരം മേഖലയില്‍ നിരവധി പൊലിസ് അതിക്രമങ്ങള്‍ നടന്നിട്ടുണ്ടെങ്കിലും ആദ്യമായാണ് പൊലിസില്‍ നിന്നും നഷ്ടട പരിഹാരം ഈടാക്കുന്നത്.