ചിറ്റൂര്‍: പവര്‍ഗ്രിഡ് കോര്‍പറേഷന്‍ കിഴക്കന്‍ മേഖലയിലെ കൃഷിയിടങ്ങളില്‍ ടവറുകള്‍ സ്ഥാപിക്കുന്നതിനെതിരേ കര്‍ഷകര്‍ പ്രതിഷേധ യോഗം ചേര്‍ന്നു. പ്രദേശത്തെ ജനങ്ങളുടെ പ്രധാന ഉപജീവന മാര്‍ഗമായ തെങ്ങുകള്‍ വെട്ടിനശിപ്പിച്ച് ടവറുകള്‍ സ്ഥാപിക്കാന്‍ സമ്മതിക്കില്ലെന്നും പകരം കേബിളുകള്‍ സ്ഥാപിക്കുന്നതിനോട് എതിര്‍പ്പില്ലെന്നും കര്‍ഷകര്‍ പറഞ്ഞു.
ഇന്നലെ കൊഴിഞ്ഞാമ്പാറ പഴനിയാര്‍ പാളയത്തു ചേര്‍ന്ന കര്‍ഷകരുടെയും രാഷ്ട്രീയ സാമൂഹിക പ്രവര്‍ത്തകരുടെയും സര്‍വകക്ഷിയോഗത്തില്‍ ടവറുകള്‍ സ്ഥാപിക്കുന്നതിനെതിരെ നിയമനടപടിക്കും തീരുമാനിച്ചു. തമിഴ്‌നാട്ടിലെ പുകലൂരില്‍നിന്ന് തൃശൂരിലേക്കുള്ള 320 കെ.വി വൈദ്യുതി ലൈനിന്റെ ടവറുകളാണ് കൃഷിയിടങ്ങളില്‍ സ്ഥാപിക്കാനുള്ള നീക്കം നടക്കുന്നത്. കൊഴിഞ്ഞാമ്പാറ പഞ്ചായത്തിലെ ഒന്ന്, രണ്ട്, മൂന്ന്, നാല് വാര്‍ഡുകളിലൂടെയാണ് ടവറുകള്‍ കടന്നുപോകുന്നത്.
കര്‍ഷകരെ സംരക്ഷിച്ചുള്ള വികസന പ്രവര്‍ത്തനങ്ങള്‍ നടപ്പാക്കാനാണ്അധികൃതര്‍ ശ്രമിക്കേണ്ടത്. കേബിള്‍ സ്ഥാപിക്കാന്‍ ടവറിനേക്കാള്‍ നാലിരട്ടി ചെലവു വരുമെന്നും ടവര്‍ സ്ഥാപിക്കുന്നതാണ് പ്രവൃത്തികള്‍ കരാറെടുത്തവര്‍ക്കു ലാഭമെന്നും കര്‍ഷകര്‍ ആരോപിച്ചു. കേബിള്‍ സ്ഥാപിക്കുന്ന സമയത്ത് ചെലവു കൂടുതലാണെങ്കിലും ടവറിനേക്കാള്‍ ആയുസ് കേബിളിനാണെന്നതിനാല്‍ സര്‍ക്കാരിന് കേബിള്‍ സ്ഥാപിക്കുന്നതാണ് നേട്ടമെന്നും കര്‍ഷകര്‍ പറഞ്ഞു.
യോഗം ഫാ. ആല്‍ബര്‍ട്ട് ആനന്ദരാജ് ഉദ്ഘാടനം ചെയ്തു. ധര്‍മരാജ് അധ്യക്ഷനായി. മുന്‍ പഞ്ചായത്ത് പ്രസിഡന്റ് കെ.എസ് തനികാചലം, തമിഴ്‌നാട് വ്യവസായി സംഘം പ്രസിഡന്റ് എം. രാജാമണി, വൈസ് പ്രസിഡന്റ് ഷണ്‍മുഖം, ഈശന്‍, പാര്‍ഥസാരഥി, ബി. ഇക്ബാല്‍, വൈ. വില്യം മോഹന്‍ദാസ് സംസാരിച്ചു.