ബെയ്ജിങ്: അരുണാചല്‍ പ്രദേശിനെയും തായ്‌വാനെയും തങ്ങളുടെ ഭാഗമായി ഉള്‍പ്പെടുത്താത്തതിനാല്‍ 28908 ലോക മാപ്പുകള്‍ ചൈന നശിപ്പിച്ചു. ചൈനീസ് കമ്പനിയായ അന്‍ഹുയി നിര്‍മിച്ച ഇംഗ്ലീഷിലുള്ള മാപ്പുകളാണ് വടക്കുകിഴക്കന്‍ നഗരത്തില്‍ കഴിഞ്ഞയാഴ്ച നശിപ്പിച്ചതെന്ന് വാര്‍ത്താ ഏജന്‍സിയായ സിന്‍ഹുവ റിപ്പോര്‍ട്ട് ചെയ്തു. വിദേശ രാജ്യത്തേക്കു കടത്താനാണ് മാപ്പുകള്‍ നിര്‍മിച്ചത്.
മാപ്പില്‍ ചൈന, തെക്കന്‍ ടിബറ്റ്, തായ്‌വാന്‍ എന്നീ പ്രദേശങ്ങള്‍ കൃത്യമായി രേഖപ്പെടുത്തിയില്ലെന്നും സിന്‍ഹുവ റിപ്പോര്‍ട്ടില്‍ പറയുന്നു. ഷാന്തോങ് പ്രവിശ്യയിലെ ക്വിങ്ദ്വാ നഗരത്തില്‍ കസ്റ്റംസ് അധികൃതര്‍ നടത്തിയ റെയ്ഡിലാണ് 800 പെട്ടികളിലായി സൂക്ഷിച്ചിരുന്ന 28908 ലോക മാപ്പുകള്‍ കണ്ടെത്തിയതെന്നും ഇവ നശിപ്പിച്ചെന്നും പ്രവിശ്യ പ്രകൃതി വിഭവ മന്ത്രാലയം വാര്‍ത്താ സമ്മേളനത്തില്‍ പറഞ്ഞു.
ഇന്ത്യയുടെ ഭാഗമായ അരുണാചല്‍ പ്രദേശും സ്വയംഭരണ പ്രദേശമായ തായ്‌വാനും തങ്ങളുടേതാണെന്നാണ് ചൈനയുടെ അവകാശവാദം. അരുണാചലിനെ തെക്കന്‍ ടിബറ്റ് സ്വയംഭരണ പ്രദേശമായിട്ടാണ് (ടി.എ.ആര്‍) ചൈന ചിത്രീകരിക്കുന്നത്.
അരുണാചല്‍ പ്രദേശിലെ അതിര്‍ത്തി തര്‍ക്ക പരിഹാരത്തിനായി ഇന്ത്യയുടെയും ചൈനയുടെയും ഇടയില്‍ 21 തവണ ചര്‍ച്ച നടത്തിയിരുന്നു.
നിയന്ത്രണ രേഖയിലെ ഇന്ത്യയുടെ 3488 കി.മീ പ്രദേശത്തിനാണ് ചൈന അവകാശ വാദമുന്നയിക്കുന്നത്.
അരുണാചല്‍ പ്രദേശില്‍ ഇന്ത്യന്‍ നേതാക്കള്‍ സന്ദര്‍ശിക്കുന്നതിനെ ചൈന ശക്തമായി എതിര്‍ക്കാറുണ്ട്. 2017 ഏപ്രിലില്‍ അരുണാചല്‍ പ്രദേശിലെ ആറ് പ്രദേശങ്ങളുടെ പേര് ചൈന മാറ്റിയിരുന്നു. പുനര്‍നാമകരണം അധികാര പരിധിയിലുള്ളതിനാല്‍ നിയമാനുസൃതമാണെന്നായിരുന്നു ചൈനീസ് വിദേശകാര്യ മന്ത്രാലയം പറഞ്ഞത്.