കുന്നംകുളം: പാറേംപാടം കമ്പിപാലത്ത് സ്വകാര്യ ബസ് സ്‌ക്കൂട്ടറില്‍ ഇടിച്ച് സ്‌ക്കൂട്ടര്‍ കത്തിനശിച്ചു. ബൈക്ക് യാത്രികന്‍ അത്ഭുതകരമായി രക്ഷപെട്ടു. രാവിലെ 9.30 ഓടെയായിരുന്നു അപകടം.
 ഗുരുവായൂര്‍ ദേവസ്വത്തിലെ സെക്യൂരിറ്റി ജീവനക്കാരനായ കൂറ്റനാട് തുമ്പിപറമ്പില്‍ പ്രജീഷ് (39) രാത്രിയിലെ ജോലി കഴിഞ്ഞ് വീട്ടിലേക്ക് മടങ്ങും വഴി നിര്‍ത്തിയിട്ടിരുന്ന പെട്ടി ഓട്ടോറിക്ഷയില്‍ ഇടിച്ച് നിയന്ത്രണം വിട്ട് കോഴിക്കോട് നിന്നും തൃശൂരിലേക്ക് പോവുകയായിരുന്ന സ്വകാര്യ ബസിലിടിക്കുകയായിരുന്നു.ഓട്ടോറിക്ഷയില്‍ ഇടിച്ചതോടെ ഇയാള്‍ സ്‌ക്കൂട്ടറില്‍ നിന്നും തെറിച്ച് കാനയിലേക്ക് വീണതിനാല്‍ രക്ഷപെട്ടു. ബസിനിടയിലേക്ക് തെറിച്ചെത്തിയ സ്‌ക്കൂട്ടറിന് തീപിടിക്കുകയായിരുന്നു. ഇതോടെ ഭയപ്പെട്ടയാത്രക്കാര്‍ ബസില്‍ നിന്നും ഇറങ്ങി മാറി.ശേഷം പരിസര വാസികളുടെ നേതൃത്വത്തില്‍ വീടുകളില്‍ നിന്ന് ജലമെത്തിച്ച് തീയണക്കാന്‍ ശ്രമിച്ചെങ്കിലും ബൈക്ക് ഭാഗികമായി കത്തിനശിച്ചു. പിന്നീട് പൊലിസെത്തി വാഹനങ്ങള്‍ മാറ്റിയിട്ടു. ബൈക്ക് യാത്രികനെ പെരുമ്പിലാവിലെ സ്വകാര്യ ആശുപത്രിയിലേക്ക് കൊണ്ടുപോയി.