തെഹ്‌റാന്‍: ഇസ്‌റാഈല്‍ തങ്ങളുടെ മഴമേഘങ്ങള്‍ കവരുന്നുവെന്ന ആരോപണവുമായി ഇറാന്‍. ഇറാന്‍ പ്രതിരോധ വിഭാഗമായ സിവില്‍ ഡിഫന്‍സ് ഓര്‍ഗനൈസേഷന്‍ മേധാവി ബ്രിഗേഡിയര്‍ ജനറല്‍ ഗുലാം റസ ജലാലിയാണു വിചിത്രകരമായ ആരോപണമുന്നയിച്ചത്.

''ഇറാനിലെ മാറിക്കൊണ്ടിരിക്കുന്ന കാലാവസ്ഥ സംശയാസ്പദമാണ്. രാജ്യത്തെ കാലാവസ്ഥാ വ്യതിയാനത്തില്‍ വിദേശ ഇടപെടല്‍ സംശയിക്കുന്നുണ്ട്. ഇറാനിയന്‍ ആകാശത്തു പ്രവേശിക്കുന്ന മേഘങ്ങള്‍ മഴ വര്‍ഷിക്കാതിരിക്കാന്‍ ഇസ്‌റാഈലും മേഖലയിലെ മറ്റൊരു രാജ്യവും സംയുക്തമായി പ്രവര്‍ത്തിക്കുന്നുണ്ട്. രാജ്യം മഴമേഘ മോഷണത്തിനിരയായിക്കൊണ്ടിരിക്കുകയാണ്.''-ജലാലി കൂട്ടിച്ചേര്‍ത്തു.
ഇക്കാര്യം ശാസ്ത്രീയ പഠനങ്ങളിലൂടെ സ്ഥിരീകരിക്കപ്പെട്ടിട്ടുണ്ടെന്നും അദ്ദേഹം പറഞ്ഞു.
അതേസമയം, ആരോപണം തള്ളിക്കളഞ്ഞ് ഇറാന്‍ കാലാവസ്ഥാ നിരീക്ഷണ വിഭാഗം മേധാവി രംഗത്തെത്തി.
ജലാലിയുടെ അടുത്ത് തനിക്കു ലഭിക്കാത്ത വിവരങ്ങളുണ്ടാകാമെങ്കിലും കാലാവസ്ഥാ അറിവുകള്‍ പ്രകാരം ഒരു രാജ്യത്തിനും മഴമേഘങ്ങള്‍ മോഷ്ടിക്കുക അസാധ്യമാണെന്നും ഇറാന്‍ മെട്രോളജിക്കല്‍ സര്‍വിസ് മേധാവി അഹദ് വസീഫി പറഞ്ഞു.