ലക്‌നൗ: ബി.ജെ.പിയിലേക്കു ചേക്കേറിയ നടിയും ഉത്തര്‍പ്രദേശിലെ ബി.ജെ.പി സ്ഥാനാര്‍ഥിയുമായ ജയപ്രദക്കെതിരെ അശ്ലീലച്ചുവയുള്ള പരാമര്‍ശം നടത്തിയ സമാജ്‌വാദി പാര്‍ട്ടി നേതാവ് കുരുക്കില്‍. ഉത്തര്‍പ്രദേശിലെ സമാജ്‌വാദി പാര്‍ട്ടി നേതാവ് ഫിറോസ് ഖാനാണ് ജയപ്രദയ്‌ക്കെതിരെ അശ്ലീല പരാമര്‍ശവുമായി രംഗത്തെത്തിയത്.
സമാജ് വാദി മുന്‍ എംപിയായ ജയപ്രദ ബിജെപിയില്‍ ചേര്‍ന്നത് ഈയിടെയാണ്. അവര്‍ക്കിനി ചേരാന്‍ മറ്റു പാര്‍ട്ടികളില്ല എന്നു പറയുന്നതാകും ശരി. അഞ്ചാമത്തെ പാര്‍ട്ടിയിലേക്കാണ് അവരെത്തിയിരിക്കുന്നത്.

സമാജ് വാദിപാര്‍ട്ടില്‍ മുഖ്യ ശത്രുവായിരുന്ന അസം ഖാനുമായി ഏറ്റുമുട്ടാനാണ് ബി.ജെ.പി ജയപ്രദയെ കളത്തിലിറക്കിയിരിക്കുന്നത്. 2004 ലും 2009 ലും ഉത്തര്‍പ്രദേശിലെ രാംപൂരില്‍ നിന്നുള്ള എം.പിയായിരുന്നു ഇവര്‍.

എന്നാല്‍ വ്യാഴാഴ്ചയാണ് സമാജ് വാദി പാര്‍ട്ടി നേതാവിന്റെ വിവാദ പരാമര്‍ശം. സമ്പല്‍ ജില്ലയിലെ എസ്പി നേതാവാണ് ഫിറോസ് ഖാന്‍. ഈ തെരഞ്ഞെടുപ്പ് കാലത്ത് രാംപൂരിന്റെ വൈകുന്നേരങ്ങള്‍ നിറമുള്ളതാകുമെന്നാതാണ് ഫിറോസ് ഖാന്റെ പരാമര്‍ശമെന്ന് എ.എന്‍.ഐ റിപ്പോര്‍ട്ട് ചെയ്യുന്നു. ഫിറോസ് ഖാന്റെ സ്ത്രീവിരുദ്ധ പരാമര്‍ശത്തിനെതിരേ സോഷ്യല്‍ മീഡിയയിലടക്കം വ്യാപക പ്രതിഷേധങ്ങളാണ് ഉയരുന്നത്.
ഉത്തര്‍പ്രദേശിലെ രാംപൂര്‍ മണ്ഡലത്തിലെ ബി.ജെ.പി സ്ഥാനാര്‍ഥിയാണ് ജയപ്രദ.