കോഴിക്കോട്: വയനാട് ലോക്‌സഭാ മണ്ഡലത്തില്‍ മത്സരിക്കുന്ന കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിക്കെതിരെ സി.പി.എം സംഘ്പരിവാറിന്റെ ശബ്ദത്തിലാണ് സംസാരിക്കുന്നതെന്ന് കെ.പി.സി.സി അധ്യക്ഷന്‍ മുല്ലപ്പള്ളി രാമചന്ദ്രന്‍. സംഘ്പരിവാറിനൊപ്പമാണ് ഇപ്പോള്‍ സി.പി.എം നില്‍ക്കുന്നത്. അമിത് ഷാക്കും കോടിയേരി ബാലകൃഷ്ണനും ഒരേ സ്വരമാണ്. രാഹുല്‍ അമേത്തിയില്‍ നിന്ന് തോറ്റോടിയെന്നാണ് ഇരുവരും പറയുന്നതെന്നും അദ്ദേഹം കുറ്റപ്പെടുത്തി. കാലത്തോടും ചരിത്രത്തോടും സി.പി.എം മാപ്പു പറയേണ്ടി വരുമെന്ന് അദ്ദേഹം ചൂണ്ടിക്കാട്ടി.

രാഹുല്‍ ദക്ഷിണേന്ത്യയില്‍ മല്‍സരിക്കുക എന്നാല്‍ അത് വലിയ രാഷ്ട്രീയ സന്ദേശമാണ് നല്‍കുന്നതെന്നും അദ്ദേഹം ചൂണ്ടിക്കാട്ടി.
ലോക്‌സഭാ തെരഞ്ഞെടുപ്പ് കഴിഞ്ഞാല്‍ സി.പി.എം പ്രാദേശിക പാര്‍ട്ടിയാകുമെന്നും അദ്ദേഹം കൂട്ടിച്ചേര്‍ത്തു. ബംഗാളില്‍ കോണ്‍ഗ്രസിന്റെ തിണ്ണ നിരങ്ങുന്നവരാണ് സി.പി.എം എന്നും മുല്ലപ്പള്ളി പറഞ്ഞു.

ആരൊക്കെയാണ് രാഹുല്‍ ഗാന്ധിയിടെ സ്ഥാനാര്‍ഥിത്വം തടയാന്‍ ശ്രമിച്ചതെന്ന് വ്യക്തമാക്കാറായില്ലെന്നും സന്ദര്‍ഭം വരുമ്പോള്‍ വ്യക്തമാക്കുമെന്നും മുല്ലപ്പള്ളി പറഞ്ഞു. ചിലപ്പോളത് അപ്രിയ സത്യങ്ങളായിരിക്കുമെന്നും മുല്ലപ്പള്ളി വ്യക്തമാക്കി.