കോട്ടക്കല്‍: ദേശീയപാത ചങ്കുവെട്ടിക്ക് സമീപം പാചക വാതകം നിറച്ച ടാങ്കര്‍ ലോറി നിയന്ത്രണം വിട്ട് ഡിവൈഡറില്‍ കയറി. ശനിയാഴ്ച പുലര്‍ച്ചെ 3.30ന് ചങ്കുവെട്ടിയിലെ ആയുര്‍വേദ കോളജിന് സമീപത്താണ് അപകടം നടന്നത്. കോഴിക്കോട് ഭാഗത്ത് നിന്നെത്തിയ വാഹനം കൊച്ചിയിലേക്ക് പോകുകയായിരുന്നു.
നിയന്ത്രണം വിട്ട വാഹനം ഡിവൈഡറില്‍ കയറി നില്‍ക്കുകയായിരുന്നു. ഡ്രൈവര്‍ക്കും ക്ലീനര്‍ക്കും പരുക്കുകളില്ല. വാഹനത്തിന്റെ ആക്‌സില്‍ പൊട്ടിയ നിലയിലാണ് ഉള്ളത്. ഹൈവേ പൊലിസിന്റെയും കോട്ടക്കല്‍ പൊലിസിന്റെയും നേതൃത്വത്തില്‍ വാഹനങ്ങള്‍ നിയന്ത്രിച്ചു. ദേശീയപാതയില്‍  ടാങ്കര്‍ ലോറി അപകടങ്ങള്‍ പതിവായിരിക്കുകയാണ്.  കഴിഞ്ഞ ചൊവ്വാഴ്ച പാലച്ചിറമാട് വളവിലും ഇതുപോലെ ടാങ്കര്‍ ലോറി നിയന്ത്രണം വിട്ട് അടുത്ത ഷെഡിലേക്ക് പാഞ്ഞ് കയറുകയുണ്ടായി. അപകടത്തില്‍ മൂന്ന് വാഹനങ്ങളും തകര്‍ന്നു. ടാങ്കിന് ലീക്ക് സംഭവിക്കാത്തതിനാല്‍ വന്‍ ദുരന്തം ഒഴിവാകുകയായിരുന്നു.