ഫറോക്ക്: അനധികൃത പുകയില ഉല്‍പ്പന്നങ്ങള്‍ വില്‍ക്കുന്ന ഇതര സംസ്ഥാനസംഘത്തെ പൊലിസ് പിടികൂടി. ഉത്തര്‍പ്രദേശ് സ്വദേശികളായ രാഹുല്‍ (26), ശേഷനാഥ് (32), ആഷിഷ്‌കുമാര്‍ (22), ഉമേഷ്(18) എന്നിവരെയാണ് എക്‌സൈസ്‌സ് സംഘം കസ്റ്റഡിയിലെടുത്തത്.
കോഴിക്കോട് അസി. എക്‌സൈസ് കമ്മിഷണര്‍ എം.എസ് വിജയനു ലഭിച്ച രഹസ്യവിവരത്തെ തുടര്‍ന്നാണ് അറസ്റ്റ്. 1,320 പാക്കറ്റുകളിലായി 52 കിലോ പുകയില ഉല്‍പ്പന്നങ്ങളുമായി വ്യാഴാഴ്ച മീഞ്ചന്ത ആര്‍ട്‌സ് കോളജ് പരിസരത്തു നിന്നാണു സംഘം പിടിയിലായത്. മംഗളൂരുവില്‍ നിന്ന് പാര്‍സല്‍ സര്‍വിസ് വഴിയാണു പുകയില ഉല്‍പന്നങ്ങള്‍ ഇവര്‍ കേരളത്തിലെത്തിക്കുന്നത്. ഇതര സംസ്ഥാന തൊഴിലാളികളെയും വിദ്യാര്‍ഥികളെയും ലക്ഷ്യമിട്ടാണു പുകയില ഉല്‍പന്നങ്ങള്‍ എത്തിക്കുന്നത്. സംസ്ഥാനത്ത് അഞ്ചിരട്ടി വിലയ്ക്കാണ് ഇവ വില്‍ക്കുന്നത്.
അതേസമയം, പിടിച്ചെടുത്തവ നിരോധിത പാന്‍മസാലയില്‍ പെടാത്തതാണെങ്കിലും കവറിനു പുറത്തു നിയമപരമായ മുന്നറിയിപ്പു രേഖപ്പെടുത്താത്തതിനും വിദ്യാഭ്യാസ സ്ഥാപനങ്ങള്‍ക്കു സമീപത്ത് ഇവ വില്‍പന നടത്തിയതിനുമാണു സംഘത്തെ കസ്റ്റഡിയിലെടുത്തത്. ഇവര്‍ക്കെതിരേ സി.ഒ.ടി.പി.എ പ്രകാരം കേസെടുത്തു.
എക്‌സൈസ് ഇന്‍സ്‌പെക്ടര്‍ ജിജോ ജെയിംസ്, പ്രവന്റിവ് ഓഫിസര്‍മാരായ എം. അബ്ദുല്‍ ഗഫൂര്‍, സി.കെ സതീശന്‍, സിവില്‍ എക്‌സൈസ് ഓഫിസര്‍ എന്‍. ശ്രീശാന്ത്, എക്‌സൈസ് ഡ്രൈവര്‍ കെ.വി മുഹമ്മദ് നിസാര്‍ എന്നിവരടങ്ങിയ സംഘമാണു പുകയില ഉല്‍പന്നങ്ങള്‍ പിടികൂടിയത്.