വിഴിഞ്ഞം: വെങ്ങാനൂര്‍ നെല്ലിവിള സ്വദേശിയായ വയോധികനെ ആക്രമിച്ച് കൊലപ്പെടുത്താന്‍ ശ്രമിച്ച കേസിലെ പ്രതിയെ വിഴിഞ്ഞം പൊലിസ് അറസ്റ്റു ചെയ്തു. മുല്ലൂര്‍ വാലന്‍വിള സ്വദേശി ജോണി(31)യാണ് അറസ്റ്റിലായത്. വീട് വാടകക്കെടുത്ത് നല്‍കുന്നതുമായി ബന്ധപ്പെട്ട തര്‍ക്കത്തിനെ തുടര്‍ന്ന് ഇക്കഴിഞ്ഞ ഒന്നിന് വെങ്ങാനൂര്‍ നെല്ലിവിള സ്വദേശി മണി(70)യെ വെട്ടിക്കൊലപ്പെടുത്താന്‍ ശ്രമിച്ച കേസിലാണ് അറസ്റ്റ്. സംഭവത്തിന് ശേഷം ഒളിവില്‍ പോയ പ്രതിയെ വിഴിഞ്ഞം സി.ഐ ജിജു റ്റി.ആര്‍, എസ്.ഐ തൃദീപ് ചന്ദ്രന്‍, സി.പി.ഒമാരായ ജോസ്, നിജിത്, കൃഷ്ണകുമാര്‍ എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.