മഞ്ചേരി: മാലിന്യങ്ങള്‍ കുമിഞ്ഞു കൂടി വൃത്തിഹീനമായി മഞ്ചേരി നഗരം. കൊതുകുകള്‍ മുട്ടയിട്ടു പെരുകിയ ഇവിടങ്ങളില്‍ പകര്‍ച്ചാ വ്യാധിഭീഷണിയും നിലനില്‍ക്കുകയാണ്. മഞ്ചേരി പഴയ ബസ്സ്റ്റാന്റും പരിസരവുമാണ് കൂടുതലും ഇത്തരത്തില്‍  മാലിന്യങ്ങള്‍ പെരുകി ദുര്‍ഗന്ധം വമിക്കുന്നത്. പ്രധാനമായും പ്ലാസ്റ്റിക് മാലിന്യമാണ് കുന്നുകൂടികിടിക്കുന്നത്. ഇതു വലിയ തോതില്‍ പകര്‍ച്ചാവ്യാധികള്‍ പരത്തുമെന്ന ആശങ്ക നിലനില്‍ക്കുകയാണ്. മഞ്ചേരി നെല്ലിപ്പറമ്പ് ജങ്ഷന് സമീപവും കച്ചേരിപ്പടി ബസ് സ്റ്റാന്‍ഡിന് സമീപവും ചങ്ങണ ബൈപാസിന്റെ ഇരുവശത്തും ഒരു നിയന്ത്രണവുമില്ലാതെ മാലിന്യം തള്ളുന്നത് പതിവായിട്ടുണ്ട്. മാസങ്ങളായി ഇതു തുടരുന്നുണ്ടെങ്കിലും നഗരസഭയുടെ ആരോഗ്യവിഭാഗം വേണ്ടവിധം ഇടപെടുന്നില്ല. മാലിന്യം ഉറവിടങ്ങളില്‍ സംസ്‌കരിക്കാന്‍ ആവിഷ്‌കരിച്ച പദ്ധതിയുടെ ഭാഗമായി നഗരസഭയുടെ ശുചീകരണ വിഭാഗം മാലിന്യ ശേഖരണം നിര്‍ത്തിയിട്ടുണ്ട്. അതിനാല്‍ മഞ്ചേരിയിലെ കച്ചവട സ്ഥാപനങ്ങള്‍ കടകളടച്ചതിനു ശേഷം റോഡുവക്കിലിട്ട് പ്ലാസ്റ്റിക് മാലിന്യമടക്കം രാത്രി കത്തിക്കുകയാണ് ചെയ്യുന്നത്. എന്നാല്‍ ഇത്തരക്കാരെ കണ്ടുപിടിക്കാന്‍ ആധുനിക സൗകര്യങ്ങളൊരുക്കാമായിരുന്നിട്ടും അത്തരം  ഇടപെടലുണ്ടാവുന്നില്ല. മഴ ശക്തമായാല്‍ റോഡുവക്കിലെ മാലിന്യവും പ്ലാസ്റ്റിക് അവശിഷ്ടങ്ങളും അഴുക്കുവെള്ളത്തില്‍ പരന്നൊഴുകുകയാണ്. പൊതുസ്ഥലത്ത് മാലിന്യം തള്ളുന്നത് ഗുരുതരമായ കുറ്റകൃത്യമായി കേസെടുക്കാന്‍ വകുപ്പുണ്ടെന്നിരിക്കെ പൊലിസും നഗരസഭയും ഉദാസീനത തുടരുകയാണെന്നാണ് ആക്ഷേപം.