വാഷിങ്ടണ്‍: ഇറാന്റെ വിപ്ലവഗാര്‍ഡിനെ ഭീകരസംഘടനയായി മുദ്രകുത്താന്‍ യു.എസ് ഒരുങ്ങുന്നതായി റിപോര്‍ട്ട്. വാള്‍സ്ട്രീറ്റ് ജേണലില്‍ വന്ന റിപോര്‍ട്ട് അമേരിക്ക മറ്റൊരു രാജ്യത്തെ സൈന്യത്തെ ഭീകര സംഘടനയായി മുദ്രകുത്താന്‍ ശ്രമിക്കുന്നത് ആദ്യമായാണെന്ന് ചൂണ്ടിക്കാട്ടുന്നു.
ഈ നീക്കം യു.എസുമായി അത്ര സുഖത്തിലല്ലാത്ത വിദേശ രാജ്യങ്ങള്‍ അമേരിക്കന്‍ സൈന്യത്തെയും രഹസ്യാന്വേഷണവിഭാഗത്തെയും ഇതേ രീതിയില്‍ കാണാനിടയാക്കുമെന്ന് വിമര്‍ശകര്‍ മുന്നറിയിപ്പ് നല്‍കുന്നു. ഇക്കാര്യം യു.എസ് സ്റ്റേറ്റ് ഡിപാര്‍ട്ട്‌മെന്റ് മിക്കവാറും നാളെ തന്നെ പ്രഖ്യാപിക്കുമെന്ന് പേരു വെളിപ്പെടുത്താത്ത ഉദ്യോഗസ്ഥന്‍ പറഞ്ഞതായി വാള്‍സ്ട്രീറ്റ് ജേണല്‍ വെളിപ്പെടുത്തുന്നു.
അതേസമയം പെന്റഗണ്‍ ഇതേക്കുറിച്ച് പ്രതികരിച്ചിട്ടില്ല. വൈറ്റ് ഹൗസും സ്റ്റേറ്റ് ഡിപാര്‍ട്ട്‌മെന്റും ഔദ്യോഗികമായി ഇത് സ്ഥിതീകരിച്ചിട്ടില്ല. ഇറാന്‍ സൈന്യത്തിന് കോടിക്കണക്കിനു ഡോളറിന്റെ സാമ്പത്തിക സഹായം ലഭിക്കുന്നത് തടയുകയാണ് യു.എസ് ഇതുകൊണ്ട് ഉദ്ദേശിക്കുന്നതെന്ന് കരുതുന്നു. അമേരിക്ക ഇറാന്‍ സൈന്യത്തെ ഭീകരവാദ സംഘടനയായി മുദ്രകുത്തുകയാണെങ്കില്‍ ലോകത്തെങ്ങുമുള്ള യു.എസ് പട്ടാളത്തെ ഐ.എസ് മാതൃകയിലുള്ള ഭീകരരായേ റവല്യൂഷനറി ഗാര്‍ഡ് പരിഗണിക്കൂവെന്ന് അതിന്റെ കമാന്‍ഡര്‍ മുഹമ്മദ് അലി ജാഫരി 2017ല്‍ മുന്നറിയിപ്പു നല്‍കിയിരുന്നു.
1,25,000 അംഗബലമുള്ള ഇറാന്‍ റവല്യൂഷനറി ഗാര്‍ഡിന് നാവിക-വ്യോമ സേനയുള്‍പ്പെടെ ശക്തമായ ടീമുണ്ട്. ഇസ്രായേലിനെയും മധ്യേഷ്യയിലെ യു.എസ് സൈനിക താവളങ്ങളെയും ലക്ഷ്യമിടുന്ന 2,000 കി.മീ ദൂരപരിധിയുള്ള മിസൈലുകള്‍ ഇറാന്റെ പക്കലുണ്ടെന്ന് റവല്യൂഷനറി ഗാര്‍ഡ് മുന്നറിയിപ്പു നല്‍കിയിരുന്നു.