ഫസ്റ്റ് ക്ലാസ് ക്രിക്കറ്റില്‍ 8000 റണ്‍സ്.  ഫസ്റ്റ് ക്ലാസ് ക്രിക്കറ്റില്‍ 8,000 റണ്‍സ് തികച്ച് കരിയറിലെ മറ്റൊരു നാഴികക്കല്ലു കൂടി പിന്നിട്ടിരിക്കുകയാണ് വിദര്‍ഭ താരം കരുണ്‍ നായര്‍. രഞ്ജി ട്രോഫി ഫൈനലില്‍ വ്യക്തിഗത സ്‌കോര്‍ 10 റണ്‍സിലെത്തിയപ്പോഴായിരുന്നു താരം 8,000 റണ്‍സ് തികച്ചത്. പാതി മലയാളിയായ കരുണ്‍ തന്റെ 114ാം ഫസ്റ്റ് ക്ലാസ് മത്സരത്തിലാണ് ഈ നേട്ടം കൈവരിക്കുന്നത്.

49 ബാറ്റിങ് ശരാശരിയില്‍ 22 സെഞ്ച്വറികളും  35 അര്‍ധസെഞ്ച്വറികളും താരത്തിന്റെ അക്കൗണ്ടിലുണ്ട്.  ഈ സീസണില്‍ ഇതുവരെ ഒമ്പത് രഞ്ജി മത്സരങ്ങളാണ് വിദര്‍ഭക്ക് വേണ്ടി കളിച്ചത്. ഇതില്‍ താരം 650ന് മുകളില്‍ റണ്‍സ് നേടിയിട്ടുണ്ട്. 

ആഭ്യന്തര ക്രിക്കറ്റില്‍ കഴിഞ്ഞ കുറേ നാളുകളായി മികച്ച ഫോമില്‍ തുടരുകയാണ് അദ്ദേഹം. കരുണിന്റെ കരിയറിലെ നാലാം രഞ്ജി ട്രോഫി ഫൈനലാണിത്. 2013-15 കാലയളവില്‍ കര്‍ണാടയ്ക്കായി രണ്ടു ഫൈനലുകള്‍ കളിച്ച കരുണ്‍ കഴിഞ്ഞ സീസണില്‍ മുംബൈക്കെതിരായ ഫൈനലില്‍ വിദര്‍ഭയ്ക്കായി കളിച്ചിരുന്നു.

കഴിഞ്ഞ മാസം നടന്ന വിജയ് ഹസാരെ ട്രോഫിയിലെ ഏഴ് മത്സരത്തില്‍ നിന്നും  752 റണ്‍സ് നേടി ശ്രദ്ധേയനായിരുന്നു കരുണ്‍. അഞ്ച് സെഞ്ച്വറികളാണ് അദ്ദേഹം ഇതില്‍ അടിച്ചുക്കൂട്ടിയത്. 

2013-14 സീസണിലെ ഫസ്റ്റ് ക്ലാസ് അരങ്ങേറ്റത്തില്‍ തന്നെ ഫൈനലില്‍ മഹാരാഷ്ട്രയെ തോല്‍പ്പിച്ച് കര്‍ണാടകയ്ക്കായി കിരീടം നേടിയിരുന്നു.  തൊട്ടടുത്ത സീസണിലെ ഫൈനലില്‍ തമിഴ്‌നാടിനെതിരെ ട്രിപ്പിള്‍ സെഞ്ചുറി (328) നേടി കിരീടനേട്ടത്തിനൊപ്പം ഫൈനലിലെ ഹീറോയുമായി കരുണ്‍.

2016ല്‍ ഇന്ത്യന്‍ ടീമില്‍ കളിച്ച താരം ഇംഗ്ലണ്ടിനെതിരേ ട്രിപ്പിള്‍ സെഞ്ചുറി നേടിയിരുന്നു. സെവാഗിന് ശേഷം ഈ നേട്ടം കൈവരിക്കുന്ന രണ്ടാമത്തെ താരം കൂടിയാണ് കരുണ്‍. 

നിലവില്‍ കേരളത്തിനെതിരെയുള്ള ഫൈനലിലും മികച്ച ബാറ്റിങ്ങാണ് കരുണ്‍ പുറത്തെടുക്കുന്നത്.