പെരുമ്പടപ്പ്: പ്രായപൂര്‍ത്തിയാകാത്ത വിദ്യാര്‍ഥിനിയെ പ്രണയം നടിച്ച് പീഡിപ്പിച്ച് വിദേശത്തേക്ക് കടക്കാന്‍ ശ്രമിച്ച യുവാവിനെ പെരുമ്പടപ്പ് പൊലിസ് പിടികൂടി. മാറഞ്ചേരി വടമുക്ക് സ്വദേശി നടുക്കാട്ടില്‍ ഇസ്ഹാഖ് (29) ആണ് പോക്‌സോ കേസില്‍ പിടിയിലായത്. ഇയാള്‍ വിദേശത്തേക്ക് കടക്കാന്‍ ശ്രമിക്കുന്നതിനിടെ മാറഞ്ചേരി മുക്കാല അധികാരിപ്പടിയില്‍ വച്ചാണ് പെരുമ്പടപ്പ് പൊലിസ് പിടികൂടിയത്.
വര്‍ഷങ്ങള്‍ക്ക് മുന്‍പ് പ്രണയം നടിച്ച് ഫോട്ടോ പകര്‍ത്തുകയും തുടര്‍ന്ന് ഇയാള്‍ വിദേശത്ത് ജോലിയില്‍ പ്രവേശിക്കുകയും ചെയ്തു. പിന്നീട് ലീവിന് നാട്ടിലെത്തിയ ഇയാള്‍ ഫോട്ടോ ദുരുപയോഗം ചെയ്യുമെന്ന് നിരന്തരമായി ഭീഷണിപ്പെടുത്തിരുന്നു. ജൂലൈ ഒന്നിന് പെണ്‍കുട്ടിയുടെ വീട്ടിലെത്തിയ ഇയാള്‍ ബലം പ്രയോഗിച്ച് പീഡിപ്പിക്കുകയായിരുന്നുവെന്ന് പൊലിസ് പറഞ്ഞു. തുടര്‍ന്ന് സംഭവം ചൈല്‍ഡ് ലൈനിനെ വിവരമറിയിക്കുകയും ചൈല്‍ഡ് ലൈന്‍ പെരുമ്പടപ്പ് പൊലിസില്‍ നല്‍കിയ പരാതിയില്‍ അറസ്റ്റ് ചെയ്യുകയുമായിരുന്നു.
ലീവ് കഴിഞ്ഞ് വിദേശത്തേക്ക് തിരികെ മടങ്ങുന്നതിനിടെയാണ് മാറഞ്ചേരി മുക്കാലയില്‍ വച്ച് പെരുമ്പടപ്പ് എസ്.ഐ വിനോദ് വലിയാട്ടൂരിന്റെ നേതൃത്വത്തിലുള്ള സംഘം അറസ്റ്റ് ചെയ്തത്. പ്രതിയെ പോക്‌സോ കേസെടുത്ത് മഞ്ചേരി കോടതിയില്‍ ഹാജരാക്കി റിമാന്‍ഡ് ചെയ്തു.