കൊല്ലം: മസാല ബോണ്ട് ആരോപണത്തില്‍ പ്രതിപക്ഷ നേതാവ് രമേശ് ചെന്നിത്തലക്ക് മറുപടിയുമായി ധനമന്ത്രി തോമസ് ഐസക്ക് രംഗത്ത്.
പബ്ലിക്ക് ഓഹരി സ്വകാര്യ ഓഹരിയായി മാറിയെന്ന് പറയുന്ന പ്രതിപക്ഷ നേതാവ് വിവരക്കേടിന്റെ അവതാരമെന്ന് തോമസ് ഐസക്ക് വാര്‍ത്താസമ്മേളനത്തില്‍ പറഞ്ഞു. പ്രതിപക്ഷ നേതാവ് ഇതുവരെ സര്‍ക്കാരിനോട് രേഖകള്‍ കാണണമെന്ന് ആവശ്യപ്പെട്ടിട്ടില്ല. പുകമറ സൃഷ്ടിച്ച് മാധ്യമങ്ങളിലൂടെ ആരോപണങ്ങള്‍ ഉന്നയിക്കുകയാണ്.

ലാവ്‌ലിന്‍ കമ്പനിയെ കേരളത്തിലേക്ക് ക്ഷണിച്ചുവരുത്തിയത് യു.ഡി.എഫ് സര്‍ക്കാരാണ്. സി.വി പത്മരാജന്‍ മന്ത്രിയായിരിക്കെയാണ് കുറ്റ്യാടി പദ്ധതിക്ക് ലാവ്‌ലിനുമായി കരാറുണ്ടാക്കിയത്. ജി കാര്‍ത്തികേയന്റെ കാലത്ത് പന്നിയാര്‍, ചെങ്കുളം, പള്ളിവാസല്‍, ഇടുക്കി ഉള്‍പ്പെടെ എല്ലാ ജലവൈദ്യുത പദ്ധതികളുടെയും അറ്റകുറ്റപ്പണിക്ക് ലാവ്‌ലിനുമായി കരാറുണ്ടാക്കിയിരുന്നുവെന്നും തോമസ് ഐസക്ക് പറഞ്ഞു.