തിരൂര്‍: റെയില്‍വേ സ്‌റ്റേഷന്‍ പ്ലാറ്റ്‌ഫോമില്‍നിന്ന് ചാക്കില്‍ ഉപേക്ഷിച്ച നിലയില്‍ ലക്ഷങ്ങള്‍ വില വരുന്ന കഞ്ചാവ് ശേഖരം കണ്ടെത്തി. മൂന്നാം നമ്പര്‍ പ്ലാറ്റ്‌ഫോമില്‍ നിന്നാണ് വിപണിയില്‍ മൂന്ന് ലക്ഷം രൂപ വില വരുന്ന കഞ്ചാവ് ആര്‍.പി.എഫ് എസ്.ഐ ഷിനോജ് കുമാര്‍, കോണ്‍സ്റ്റബിള്‍മാരായ കെ.സിറാജ്, വി.എന്‍ രവീന്ദ്രന്‍ എന്നിവര്‍ പിടിച്ചെടുത്തത്. തിരൂര്‍ മാര്‍ക്കറ്റില്‍നിന്ന് പ്ലാറ്റ്‌ഫോമിലേക്ക് കടക്കാന്‍ വഴിയുണ്ട്.
ട്രെയിനില്‍ നിന്നും പ്ലാറ്റ്‌ഫോമിലേക്ക് കഞ്ചാവ് ഇട്ടു നല്‍കി ഇവിടെയുള്ള ലഹരിക്കടത്തുകാര്‍ ഇത് ശേഖരിക്കുന്നതാണ് പതിവ്. റെയില്‍വേ പൊലിസിനെ കണ്ടതോടെ ലഹരിക്കടത്തുകാര്‍ മുങ്ങുകയായിരുന്നു.
തിരൂര്‍ റെയില്‍വേ സ്റ്റേഷന്‍ പ്ലാറ്റ്‌ഫോമില്‍നിന്ന് ഇതിന് മുന്‍പും ഉപേക്ഷിക്കപ്പെട്ട നിലയില്‍ കഞ്ചാവും പാന്‍മസാല ശേഖരവും പിടികൂടിയിട്ടുണ്ട്. ലഹരി ശേഖരം വീണ്ടും കണ്ടെത്തിയ സാഹചര്യത്തില്‍ പരിശോധന ശക്തമാക്കിയതായി ആര്‍.പി.എഫ് അറിയിച്ചു.