തിരുവനന്തപുരം: പൊലിസ് മേധാവി സ്ഥാനത്ത് നിന്ന് ഒഴിയാന്‍ തയാറെടുക്കുമ്പോള്‍ നേട്ടങ്ങള്‍ നിരത്തി ലോക്‌നാഥ് ബെഹ്‌റ. പദ്ധതി വിഹിതത്തിന്റെ 96 ശതമാനം ചെലവിട്ടതായും 46 കോടിയുടെ വികസന പദ്ധതികള്‍ പൊലിസില്‍ നടപ്പാക്കിയതായും ബെഹ്‌റ വാര്‍ത്താകുറിപ്പില്‍ അറിയിച്ചു.
സുപ്രിംകോടതി ഉത്തരവ് വന്നതോടെ ടി.പി സെന്‍കുമാറിനെ അടുത്ത ദിവസം തന്നെ സര്‍ക്കാര്‍ പൊലിസ് മേധാവിയാക്കി നിയമിച്ചേക്കും. കേന്ദ്ര ഡപ്യൂട്ടേഷന് ശ്രമം തുടങ്ങിയ ബെഹ്‌റ ഇതു മുന്നില്‍ കണ്ടാണ് വാര്‍ത്താകുറിപ്പ് ഇറക്കിയത്. സ്മാര്‍ട്ട് പൊലിസിങ്, ശാസ്ത്രീയ കുറ്റാന്വേഷണ സംവിധാനങ്ങള്‍, മൊബൈല്‍ ആപ്ലിക്കേഷനുകള്‍, സ്ത്രീസുരക്ഷാ പദ്ധതികള്‍, പരിശീലന സംവിധാനങ്ങളുടെ ആധുനികവല്‍ക്കരണം തുടങ്ങിയ മേഖലകളിലാണ് കൂടുതല്‍ പണം ചെലവിട്ടത്. കുറ്റാന്വേഷണവും ക്രമസമാധാനവും മെച്ചപ്പെടുത്തുന്നതിനും സ്ത്രീ സുരക്ഷയ്ക്കുമാണ് പദ്ധതിയില്‍ ഊന്നല്‍ നല്‍കിയത്. 100 പൊലിസ് സ്റ്റേഷനുകള്‍ സ്മാര്‍ട് സ്റ്റേഷനുകളാക്കി.
സൈബര്‍ ഫോറന്‍സിക്കില്‍ നിരവധി വര്‍ഷങ്ങള്‍ക്കു ശേഷം 100 പേര്‍ക്ക് വിദഗ്ധ പരിശീലനം നല്‍കി. സൈബര്‍സെല്‍, സൈബര്‍ പൊലിസ് അംഗങ്ങള്‍ക്ക് ആധുനിക പരിശീലനം നല്‍കി. പൊലിസ് ഫോട്ടോകള്‍ കേന്ദ്രീകൃതമായി സൂക്ഷിക്കുന്നതിന് ആധുനികഫോട്ടോ ആര്‍ക്കൈവ് സംവിധാനം ഏര്‍പ്പെടുത്തി. ശാസ്ത്രീയ കുറ്റന്വേഷണത്തിന് ആധുനികമായ ചോദ്യം ചെയ്യല്‍ മുറികള്‍ ജില്ലകളില്‍ സ്ഥാപിച്ചു.