പട്ടാമ്പി: കൊപ്പം ജി.വി.എച്ച്.എസ്.എസ് സുവര്‍ണ ജൂബിലിയിലേക്ക് കടക്കുമ്പോള്‍ ഇതിന് മിഴിവേകാന്‍ പൂര്‍വവിദ്യാര്‍ഥികള്‍ ബൃഹദ് പദ്ധതികള്‍ രൂപീകരിക്കുന്നു. 2017 മെയ് 1 മുതല്‍ 2018 മാര്‍ച്ചില്‍ അവസാനിക്കുന്ന സുവര്‍ണ ജൂബിലി വര്‍ഷത്തില്‍ മാസം തോറും വിവിധ പരിപാടികള്‍ നടത്താനാണ് പൂര്‍വ വിദ്യാര്‍ഥികള്‍ ലക്ഷ്യമിടുന്നത്. 1968ല്‍ ആരംഭിച്ചതാണ് ഈ സ്‌കൂള്‍.
സുവര്‍ണ ജൂബിലിയുടെ ഔദ്യോഗിക ഉദ്ഘാടനം മെയ് അവസാനത്തില്‍ നടക്കും. പൂര്‍വ്വ വിദ്യാര്‍ഥികളുടെ നേതൃത്വത്തില്‍ ഇതിന് മുന്നോടിയായിട്ടാണ് ഒരു വട്ടം കൂടി സംഘടിപ്പിച്ചിട്ടുള്ളത്.
ഒട്ടുമിക്ക മേഖലയിലും മികവ് പുലര്‍ത്തുന്നതാണ് ഈ വിദ്യാലയം. സ്‌കൂളിന് 100 ശതമാനം വിജയം ഉണ്ടാക്കുന്നതിനുള്ള പ്രത്യേക പരിശീലന പരിപാടികള്‍, പിന്നോക്കം നില്‍ക്കുന്നവരെ നേരത്തെ കണ്ടെത്തി പരിശീലനം നല്‍കല്‍, വിദ്യാര്‍ഥികള്‍ക്ക് പറയാനുള്ളത് പറയാന്‍ അവസരമൊരുക്കുന്ന വിദ്യാര്‍ഥികളുടെ പാര്‍ലമെന്റ്, സ്‌ക്കൂള്‍ കോമ്പൗണ്ടില്‍ 50 സുവര്‍ണ വൃക്ഷങ്ങള്‍ ജൂബിലി യെ ഓര്‍മിച്ച് നടല്‍, ലഹരി വസ്തുക്കളുടെ ഉപയോഗത്തിനെതിരായി സ്‌കൂള്‍ മുതല്‍ കൊപ്പം സെന്റര്‍ വരെ സമൂഹ ചിത്രരചന, പൂര്‍വ വിദ്യാര്‍ഥികളുടെ കലാ കായിക മത്സരങ്ങള്‍, സ്‌കൂള്‍ ഭൗതിക സാഹചര്യങ്ങള്‍ വര്‍ധിപ്പിക്കാനായുള്ള കൂട്ടായ പ്രവര്‍ത്തനം, വിദ്യാലയത്തിന് സൗജന്യമായി സ്ഥലം നല്‍കിയ കറുവത്ത് ഏച്ചു നായരെ അനുസ്മരിക്കല്‍, പൂര്‍വ വിദ്യാര്‍ഥികളെ വിവിധ പരിപാടിയില്‍ പങ്കെടുപ്പിക്കല്‍, സമീപ പ്രദേശങ്ങളിലെ സ്‌കൂള്‍ വിദ്യാര്‍ഥികളെ സംഘടിപ്പിച്ച് മെഗാ ക്വിസ് മത്സരം, ഉദ്ഘാടന സമ്മേളനത്തോടനുബന്ധിച്ച് കൊപ്പം സെന്റര്‍ മുതല്‍ സ്‌ക്കൂള്‍ വരെ ഘോഷയാത്ര എന്നി പരിപാടികള്‍ക്കാണ് പൂര്‍വ വിദ്യാര്‍ഥികള്‍ ഇപ്പോള്‍ രൂപം കൊടുത്തിട്ടുള്ളത്.
1968 മുതലുള്ളവര്‍ ചടങ്ങിന് പങ്കെടുക്കും. ഇതുമായി ബന്ധപ്പെട്ട് വന്‍ ക്യാംപയിനാണ് പൂര്‍വ വിദ്യാര്‍ഥികള്‍ നടത്തുന്നത്. സോഷ്യല്‍ മീഡിയ ഉപയോഗിച്ച് ഇതിനായി തീം സോങ്ങ് പ്രചരണവും നടത്തുന്നുണ്ട്.
8000 വിദ്യാര്‍ഥികളിലേക്ക് സുവര്‍ണ ജൂബിലി സന്ദേശ മെത്തിച്ച് വന്‍ പ്രചരണമാണ് പൂര്‍വ വിദ്യാര്‍ഥികള്‍ ഒരുക്കുന്നത്. സ്‌കൂളിന്റെ ഭൗതിക സാഹചര്യം ഉയര്‍ത്താന്‍ ഈ കൂട്ടായ്മക്ക് കഴിയും എന്ന വിശ്വാസവും ഇവര്‍ക്കുണ്ട്.