ലണ്ടന്‍: ബ്രക്‌സിറ്റുമായി ബന്ധപ്പെട്ട് യൂറോപ്യന്‍ യൂനിയനുമായി (ഇ.യു)ചര്‍ച്ചകള്‍ നടത്തുന്നതിന് പകരം നിയമ നടപടികള്‍ സ്വീകരിക്കാന്‍ യു.എസ് പ്രസിഡന്റ് ഡൊണാള്‍ഡ് ട്രംപ് ആവശ്യപ്പെട്ടുവെന്ന് ബ്രിട്ടന്‍ പ്രധാനമന്ത്രി തേരേസാ മേ. ബ്രിക്‌സിറ്റുമായി ബന്ധപ്പെട്ട് തന്റെ നിര്‍ദേശം ക്രൂരമാണെന്ന് തേരേസാ പറഞ്ഞുവെന്ന് വെള്ളിയാഴ്ച ട്രംപ് പറഞ്ഞിരുന്നു. ഇത് സംബന്ധിച്ച് ബി.ബി.സി മാധ്യമപ്രവര്‍ത്തകന്റെ ചോദ്യത്തോട് പ്രതികരിക്കുകയായിരുന്നു തെരേസാ മേ. 

യൂറോപ്യന്‍ യൂനിയനുമായി പ്രശ്‌നങ്ങളില്‍ നിന്ന് ഇറങ്ങിപ്പോരില്ലെന്നും ചര്‍ച്ച നടത്തി ബ്രിട്ടന്റെ പുരോഗതിക്കായി ശ്രമം നടത്തുമെന്നും തെരേസാ മേ പറഞ്ഞു. ബ്രിക്‌സിറ്റ് തീരുമാനത്തില്‍ ഇളവുകളില്ല. എന്നാല്‍ വ്യാപാര കരാറുകള്‍ തുടരും. അയര്‍ലന്‍ഡ് അതിര്‍ത്തിയുമായി ബന്ധപ്പെട്ടുള്ള കരാറുകളിലും ബ്രിട്ടനിലെ തൊഴിലുകള്‍ സംരക്ഷിക്കുന്നതിനും നിയമനിര്‍മാണം നടത്തുമെന്നും അവര്‍ പറഞ്ഞു.
ബ്രക്‌സിറ്റ് പ്രാബല്യത്തില്‍ വരുന്നതോടെ വ്യാപാര കരാറുകള്‍ തകരുമെന്ന് ബ്രിട്ടന്‍ സന്ദര്‍ശനത്തനിടെ ട്രംപ് കഴിഞ്ഞ ദിവസം പറഞ്ഞിരുന്നു. കൂടാതെ തെരേസാ മേയുടെ ബ്രക്‌സിറ്റ് നിലപാടുകളില്‍ പ്രതിഷേധിച്ച് വിദേശകാര്യ സെക്രട്ടറി ബോറിസ് ജോണ്‍സണ്‍ രാജിവച്ചിരുന്നു.