ഗൂഡല്ലൂര്‍: ജനവാസ കേന്ദ്രത്തിലെത്തിയ കാട്ടാനയുടെ ആക്രമണത്തില്‍ നിന്ന് കുടുംബം തലനാരിഴക്ക് രക്ഷപ്പെട്ടു.
ദേവര്‍ ഷോലപഞ്ചായത്തിലെ മൂന്നാം ഡിവിഷനു സമീപത്തെ ചുണ്ട വയലിലാണ് സംഭവം. ജനവാസ കേന്ദ്രത്തിലെത്തിയ കാട്ടാന മണികണ്ഠന്റെ വീട് ആക്രമിക്കുകയായിരുന്നു. ഈ സമയം മണികണ്ഠനും ഭാര്യ ശോഭയും വീട്ടിലുണ്ടായിരുന്നെങ്കിലും പരുക്കേല്‍ക്കാതെ പുറത്തേക്കോടി രക്ഷപ്പെട്ടു.
വിവരമറിഞ്ഞ് വനം വകുപ്പ് ഉദ്യോഗസ്ഥര്‍ സ്ഥലത്തെത്തി. ദേവര്‍ ഷോലപഞ്ചായത്തിലെ മൂന്നാം നമ്പര്‍, ദേവന്‍ നമ്പര്‍ രണ്ട്, വുഡ് ബ്രയര്‍ തുടങ്ങിയ പ്രദേശങ്ങളില്‍ ദിവസങ്ങളായി കാട്ടാനകള്‍ കൂട്ടമായും ഒറ്റയായും ജനവാസകേന്ദ്രങ്ങളില്‍ എത്തുന്നത് പതിവായിരിക്കുകയാണ്.