ശ്രീനഗര്‍: കശ്മിരില്‍ പശുവിന്റെ പേരില്‍ രണ്ടു മുസ്‌ലിംകള്‍ക്കുനേരെ ആക്രമണം. സ്വന്തം കൃഷിയിടത്തിലിറങ്ങിയ പശുക്കളെ ഓടിച്ചുവിട്ടതിനാണ് ബന്ധുക്കളായ രണ്ടുപേരെ തീവ്ര സംഘടനാ പ്രവര്‍ത്തകര്‍ വളഞ്ഞിട്ട് ക്രൂരമായി മര്‍ദിച്ചത്.

റാസി ജില്ലയില്‍ ദിവസങ്ങള്‍ക്കു മുന്‍പു നടന്ന സംഭവത്തിന്റെ വിഡിയോ കഴിഞ്ഞ ദിവസമാണ് പുറത്തായത്. നാല്‍പതുകാരനായ മുഹമ്മദ് അസ്ഗര്‍, 26കാരനായ ജാവീദ് അഹമ്മദ് എന്നിവരെ ഒരുകൂട്ടമാളുകള്‍ മര്‍ദിക്കുന്നതും തളര്‍ന്നുകിടന്ന ഇവരെ പൊലിസ് കൊണ്ടുപോകുന്നതുമാണ് വിഡിയോയിലുള്ളത്. അസ്ഗറിന്റെ ചെറിയ മകന്‍ കൃഷിയിടത്തില്‍നിന്നു പശുക്കളെ ഓടിച്ചെന്നും പശുവിനു പരുക്കേറ്റെന്നും ആരോപിച്ചായിരുന്നു ആക്രമണം.

സംഭവസ്ഥലത്തെത്തിയ പൊലിസുകാര്‍ ആദ്യം ആക്രമണം തടഞ്ഞില്ലെന്നും ആരോപണമുയര്‍ന്നിട്ടുണ്ട്. സംഭവത്തില്‍ കേസെടുത്ത പൊലിസ്, പശുവിനെ പരുക്കേല്‍പിച്ചെന്നാരോപിച്ച് അസ്ഗറിന്റെ മകനെതിരേയും കേസെടുത്തിട്ടുണ്ട്.