കണ്ണൂര്‍: പ്രളയക്കെടുതിയില്‍ പൂര്‍ണമായി നശിച്ചതും വാസയോഗ്യമല്ലാതായതുമായ മൂഴുവന്‍ വീടും വീണ്ടെടുക്കാന്‍ തദ്ദേശസ്ഥാപനങ്ങളുടെ ഏകോപനം വേണമെന്ന് സര്‍വകക്ഷി യോഗം. സര്‍ക്കാരില്‍ നിന്ന് ലഭിക്കുന്ന നഷ്ടപരിഹാരവും മറ്റ് ആനുകൂല്യങ്ങളും ദുരിത ബാധിതര്‍ക്ക് ലഭ്യമാക്കാനാവശ്യമായ നടപടികള്‍ എല്ലാ തലങ്ങളിലുമായി കൈക്കൊള്ളാനും യോഗം തീരുമാനിച്ചു.
ദീര്‍ഘ കാലാടിസ്ഥാനത്തില്‍ ദുരിത ബാധിത മേഖലകളെ പുനര്‍ നിര്‍മിക്കേണ്ടതുണ്ട്. ഇതിനായി പ്രത്യേക പാക്കേജിന് രൂപം നല്‍കാനാണ് സര്‍ക്കാര്‍ ആലോചിക്കുന്നത്. യോഗത്തില്‍ ഉയര്‍ന്നുവന്ന ആവശ്യങ്ങളെല്ലാം പരിഗണിച്ചുള്ള നിര്‍ദേശങ്ങളും നടപടികളും പാക്കേജിന്റെ ഭാഗമായി ഉണ്ടാകുമെന്നും അവര്‍ പറഞ്ഞു.
പുനരധിവാസ പ്രവര്‍ത്തനങ്ങള്‍ക്ക് തദ്ദേശസ്ഥാപനങ്ങള്‍ പ്രത്യേക പരിഗണന നല്‍കണമെന്ന് വ്യവസായ വകുപ്പ് മന്ത്രി ഇ.പി ജയരാജന്‍ പറഞ്ഞു.
മന്ത്രി രാമചന്ദ്രന്‍ കടന്നപ്പള്ളി, പി.കെ ശ്രീമതി എം.പി, കെ.കെ രാഗേഷ് എം.പി, എം.എല്‍.എമാരായ സി. കൃഷ്ണന്‍, കെ.സി ജോസഫ്, സണ്ണി ജോസഫ്, ജയിംസ് മാത്യു, എ.എന്‍ ഷംസീര്‍, ടി.വി രാജേഷ്, സി.പി.എം ജില്ലാ സെക്രട്ടറി പി. ജയരാജന്‍, ഡി.സി.സി പ്രസിഡന്റ് സതീശന്‍ പാച്ചേനി, മുസ്‌ലിം ലീഗ് ജില്ലാ ട്രഷറര്‍ വി.പി വമ്പന്‍, സി.പി.ഐ പ്രതിനിധി കെ.ടി ജോസ്, ആര്‍.എസ്.എസ് പ്രതിനിധി വത്സന്‍ തില്ലങ്കേരി, മേയര്‍ ഇ.പി ലത, ജില്ലാ പഞ്ചായത്ത് പ്രസിഡന്റ് കെ.വി സുമേഷ് പങ്കെടുത്തു.