കണ്ണൂര്‍: ലോക്‌സഭാ തെരഞ്ഞെടുപ്പ് നടപടികള്‍ ചിട്ടയായി കുറ്റമറ്റ രീതിയില്‍ പൂര്‍ത്തിയാക്കുന്നതില്‍ താരമായത് 'പോള്‍ മാനേജര്‍' മൊബൈല്‍ ആപ്പ്. ഓരോ ബൂത്തിലും അനുനിമിഷം നടക്കുന്ന കാര്യങ്ങള്‍ ജില്ലാ തലത്തിലുള്ള കണ്‍ട്രോള്‍ റൂമില്‍ നിന്നു നേരിട്ടു നിരീക്ഷിക്കാനും പ്രശ്‌നങ്ങള്‍ പരിഹരിക്കാനും ഏറെ സഹായകമായത് ഈ സംവിധാനമാണ്.
പോളിങിനു തലേദിവസം പോളിങ് സംഘം വിതരണ കേന്ദ്രത്തില്‍ നിന്നു പുറപ്പെട്ടതു മുതല്‍ പോള്‍ മാനേജരുടെ നേരിട്ടുള്ള നിയന്ത്രണത്തിലായിരുന്നു. വിതരണ കേന്ദ്രത്തില്‍ നിന്നു പുറപ്പെട്ട സമയം, ബൂത്തില്‍ എത്തിയ സമയം എന്നിങ്ങനെ 19 ചോദ്യങ്ങള്‍ക്കുള്ള ഉത്തരം ഫീഡ് ചെയ്യാനുള്ള സംവിധാനമാണു പോള്‍ മാനേജര്‍ ആപ്പിലുണ്ടായിരുന്നത്. ഓരോ ചോദ്യത്തിനും മറുപടി നല്‍കി മാത്രം അടുത്തഘട്ടത്തിലേക്കു പോകാന്‍ കഴിയുന്ന രീതിയായിരുന്നു ഇതില്‍. ഓരോ മണിക്കൂറിലുമുള്ള വോട്ടെടുപ്പിന്റെ വിശദാംശങ്ങള്‍ അപ്‌ലോഡ് ചെയ്യാനും ക്രമീകരണമുണ്ടായിരുന്നു. വോട്ടെടുപ്പ് അവസാനിക്കുന്ന സമയമായ വൈകിട്ട് ആറിന് എത്രപേര്‍ വരി നില്‍ക്കുന്നുവെന്നും വോട്ടെടുപ്പ് പൂര്‍ത്തിയായ സമയവും ആകെ പോള്‍ ചെയ്ത വോട്ടും ഇതില്‍ അപ്‌ലോഡ് ചെയ്തതു ജില്ലാ തലത്തിലെ വിവരങ്ങള്‍ ക്രോഡീകരിക്കാന്‍ എളുപ്പമായി. പ്രിസൈഡിങ്ങ് ഓഫിസറോ ഫസ്റ്റ് പോളിങ് ഓഫിസറോ ആണ് ബൂത്തുകളില്‍ നിന്ന് ഈ വിവരങ്ങള്‍ അപ്‌ലോഡ് ചെയ്തത്.
ഈ മൊബൈല്‍ ആപ്പിനെ കേരള പോള്‍സ് എന്ന പേരില്‍ തയാറാക്കിയ വെബ് പോര്‍ട്ടലുമായി ബന്ധിപ്പിച്ചാണു ജില്ലാതലത്തില്‍ വിവരങ്ങള്‍ ക്രോഡീകരിച്ചത്. ജില്ലാ ഇന്‍ഫര്‍മാറ്റിക്‌സ് ഓഫിസര്‍ ആന്‍ഡ്രൂസ് വര്‍ഗീസിന്റെ നേതൃത്വത്തിലുള്ള സംഘമാണു ജില്ലയില്‍ ഈ പ്രവര്‍ത്തനങ്ങളാകെ ഏകോപിപ്പിച്ചത്.