തിരുവനന്തപുരം: 15-ാമത് സംസ്ഥാന അന്തര്‍ ജില്ലാ ക്ലബ് അത്‌ലറ്റിക് ചാംപ്യന്‍ഷിപ്പിന് ഇന്ന് തുടക്കമാകും.
സെപ്റ്റംബര്‍ ഒന്നു വരെ തിരുവനന്തപുരം ചന്ദ്രശേഖരന്‍ നായര്‍ സ്റ്റേഡിയത്തിലാണ് ചാംപ്യന്‍ഷിപ്പ് നടക്കുന്നത്. വിവിധ ജില്ലകളിലെ 120 ക്ലബുകളില്‍ നിന്നായി 1800 കായിക താരങ്ങള്‍ മത്സരത്തില്‍ പങ്കെടുക്കും. രാവിലെ 6.15ന് അണ്ടര്‍ 20 പെണ്‍കുട്ടികളുടെ 3,000 മീറ്ററോടെയാണ് ചാംപ്യന്‍ഷിപ്പിന് തുടക്കമാവുക.
ആദ്യ ദിനത്തില്‍ 40 ഫൈനലുകള്‍ നടക്കും. സൗത്ത് സോണ്‍, ഓപണ്‍ നാഷനല്‍ മീറ്റുകള്‍ക്കുള്ള കേരള ടീമിനെ തിരഞ്ഞെടുക്കാനുള്ള സെലക്ഷന്‍ ട്രയല്‍സ് കൂടിയാണ് ചാംപ്യന്‍ഷിപ്പ്. ഉച്ചയ്ക്ക് 2.30ന് ഔദ്യോഗിക ഉദ്ഘാടനം എല്‍.എന്‍.സി.പി ഡയറക്ടര്‍ ഡോ. ജി കിഷോര്‍ നിര്‍വഹിക്കും.