മുള്ളൂര്‍ക്കര: എസ്.എസ്.എല്‍.സി ഫലമറിഞ്ഞറിഞ്ഞതിന്റെ ആഹ്ലാദം പങ്കുവെക്കാന്‍ കൂട്ടുകാരുടെ വീടുകളിലേക്ക് ബൈക്കുകളുടെ പുറകിലിരുന്ന് പോകുന്നതിനിടെ ബൈക്കുകള്‍ കൂട്ടിയിടിച്ച് മൂന്ന് വിദ്യാര്‍ഥികള്‍ക്ക് പരുക്കേറ്റു. മുള്ളൂര്‍ക്കര പുത്തന്‍പീടികയില്‍ ഫവാസ് (16), ഇരു നിലംേകാട് പൂപറമ്പില്‍ സജീം (16), മുള്ളൂര്‍ക്കര മാണാത്ത് പറമ്പില്‍ അന്‍ഷീദ് (16) എന്നിവര്‍ക്കാണ് പരുക്കേറ്റത്.
ഇതില്‍ ഫവാസിന്റെ  പരുക്ക് അതീവ ഗുരുതരമാണ്. റോഡില്‍ വീണ് കിടന്ന വിദ്യാര്‍ഥികളെ നാട്ടുകാര്‍ ചേര്‍ന്ന് വടക്കാഞ്ചേരി ജില്ലാ ആശുപത്രിയില്‍ പ്രവേശിപ്പിച്ചു. വിദഗ്ദ ചികിത്സ ആവശ്യമായതിനാല്‍ തൃശൂരിലേക്ക് കൊണ്ട് പോകാന്‍ ആശുപത്രിയില്‍ ആംബുലന്‍സ് ഇല്ലാതിരുന്നത് പ്രതിഷേധത്തിന് വഴിവച്ചു. തൃശൂര്‍ പൂരം ഡ്യൂട്ടിയിലായിരുന്ന വടക്കാഞ്ചേരി ആക്ട്‌സ് പ്രവര്‍ത്തകര്‍ സ്ഥലത്തെത്തിയാണ് കുട്ടികളെ ആശുപത്രിയിലേക്ക് മാറ്റിയത്.