കുവൈത്ത് സിറ്റി: അന്തരിച്ച കുവൈത്ത് അമീര്‍ ശൈഖ് സബാഹ് അല്‍ അഹ്മദിന്റെ ഖബറിടം സന്ദര്‍ശിക്കാനായി പ്രമുഖര്‍ അടക്കമുള്ളവരുടെ ഒഴുക്ക്. ഖബറിടത്തിലെത്തുന്ന സന്ദര്‍ശകര്‍ ഖുര്‍ആന്‍ പാരായണം ചെയ്യുകയും അദ്ദേഹത്തിന്റെ പാപമോചനത്തിനായി പ്രാര്‍ഥന നടത്തുകയും ചെയ്യുന്നു.
അറബ് മേഖലയുടെ സമാധാന ദൂതനായി പ്രവര്‍ത്തിച്ച അമീറിന്റെ വിയോഗത്തില്‍ വലിയ ദുഃഖമാണ് കുവൈത്തികള്‍ക്കും വിദേശികള്‍ക്കുമുള്ളത്. അമീറിനോട് ജനങ്ങള്‍ക്കുണ്ടായിരുന്ന സ്‌നേഹമാണ് ഇപ്പോള്‍ ഖബറിടത്തില്‍ കാണുന്ന തിരക്ക് സൂചിപ്പിക്കുന്നത്.
മാനുഷിക മൂല്യങ്ങള്‍ കാത്തുസൂക്ഷിക്കുകയും ജനങ്ങളെ പരിഗണിക്കുകയും ചെയ്തിരുന്ന ഭരണാധികാരിയാണ് അമീറെന്ന് സന്ദര്‍ശകര്‍ അനുസ്മരിച്ചു.
രാജ്യത്തെ ജനങ്ങളെ സേവിക്കുന്നതിനൊപ്പം രാജ്യങ്ങള്‍ തമ്മിലുള്ള സമാധാനത്തിനും സഹവര്‍ത്തിത്വത്തിനും അദ്ദേഹം മുന്‍ഗണന നല്‍കി. കുവൈത്തി ജനങ്ങളുമായി ഏറെ അടുപ്പം കാത്തുസൂക്ഷിച്ചിരുന്നതായും സന്ദര്‍ശകര്‍ ഓര്‍ക്കുന്നു.