പിടികൂടിയ 23,129 പേരില്‍നിന്ന് പിഴയായി ഈടാക്കിയത് 44 ലക്ഷം രൂപ

കൊണ്ടോട്ടി: സംസ്ഥാനത്ത് പൊതുനിരത്തില്‍ പുക വലിച്ചതിന് ജനുവരി,ഫെബ്രുവരി, മാര്‍ച്ച് മാസങ്ങളില്‍ മാത്രം പിടിയിലായത് 23,129 പേര്‍. ഇവരില്‍നിന്ന് മാത്രം 44,98,800 രൂപയാണ് സിഗരറ്റ് ആന്‍ഡ് അദര്‍ ടുബാകോ പ്രൊഡക്ട് ആക്ട് പ്രകാരം പിഴ ചുമത്തിയത്. പൊതുനിരത്തില്‍ പുകവലിക്കല്‍,18 വയസിന് താഴെ പ്രായമുളളവര്‍ക്ക് പുകയില ഉല്‍പന്നങ്ങള്‍ കൈമാറുക, വിദ്യാഭ്യാസ സ്ഥാപനങ്ങള്‍ക്ക് നൂറ് മീറ്റര്‍ പരിധിയില്‍ പുകയില ഉല്‍പന്നങ്ങള്‍ വില്‍ക്കുക, ആരോഗ്യ മുന്നറിയിപ്പ് നല്‍കാത്ത ഉല്‍പന്നങ്ങള്‍ വിതരണം ചെയ്യുക, പുകയില ഉല്‍പ്പന്നങ്ങളുടെ പരസ്യം നല്‍കുക തുടങ്ങിയവയാണ് സിഗരറ്റ് ആന്‍ഡ് അദര്‍ ടുബാകോ പ്രൊഡക്ട് ആക്ടിന് പരിധിയില്‍ വരുന്ന കേസുകള്‍. ഇവയില്‍ ഏറ്റവും കൂടുതല്‍ പിടി വീഴുന്നത് പൊതുനിരത്തില്‍ പുകവലിക്കുന്നവര്‍ക്കാണ്.

ജനുവരിയില്‍ 7,927 പേരില്‍നിന്ന് 15,52,300 രൂപയും, ഫെബ്രുവരിയില്‍ 6, 328 പേരില്‍ നിന്ന് 12,63,400 രൂപയും മാര്‍ച്ചില്‍ 8,874 പേരില്‍നിന്ന് 16,83,100 രൂപയുമാണ് പിഴ ചുമത്തിയത്. പൊതു നിരത്തില്‍ പുകവലിക്ക് പിടിയിലായാല്‍ വലിയ പിഴ കൊടുക്കേണ്ടി വരുമ്പോഴും പിടിയിലാവുന്നവരുടെ എണ്ണം വര്‍ധിക്കുകയാണ്. 18 വയസിന് താഴെ പ്രായമുള്ളവര്‍ക്ക് പുകയില ഉല്‍പന്നങ്ങള്‍ കൈമാറിയതിന് ജനുവരിയില്‍ മാത്രം 27 പേരില്‍നിന്ന് 27,900 രൂപയാണ് പിഴചുമത്തിയത്. ഫെബ്രുവരിയില്‍ 24 പേരില്‍നിന്ന് 53,700 രൂപയും മാര്‍ച്ചില്‍ 24 പേരില്‍നിന്ന് 21,400 രൂപയും പിഴ ചുമത്തിയിട്ടുണ്ട്.