ന്യൂഡല്‍ഹി: കോണ്‍ഗ്രസ് അധ്യക്ഷസ്ഥാനത്ത് രാഹുല്‍ ഗാന്ധി തുടരണമെന്ന ആവശ്യം ശക്തമായിരിക്കെ, അമേത്തിയില്‍ അദ്ദേഹത്തിനുണ്ടായ തോല്‍വിയുടെ കാരണം കണ്ടെത്താന്‍ രണ്ടംഗ സമിതിയെ കോണ്‍ഗ്രസ് നേതൃത്വം നിയോഗിച്ചു.
കോണ്‍ഗ്രസ് സെക്രട്ടറിമാരായ സുബൈര്‍ ഖാന്‍, കെ.എല്‍ ശര്‍മ എന്നിവരാണ് സമിതി അംഗങ്ങള്‍.
റായ്ബറേലിയില്‍ സോണിയാഗാന്ധിയുടെ തെരഞ്ഞെടുപ്പ് പ്രചാരണത്തിന് നേതൃത്വം നല്‍കിയ ആളാണ് കെ.എല്‍ ശര്‍മ. അദ്ദേഹം അമേത്തിയിലും കാര്യമായ പ്രവര്‍ത്തനം നടത്തിയിരുന്നു.

കഴിഞ്ഞ ദിവസം തന്നെ ഇരുവരും അമേത്തിയില്‍ എത്തി. ജില്ലാ കോണ്‍ഗ്രസ് കമ്മിറ്റി ഭാരവാഹികളുമായി ഇരുവരും ചര്‍ച്ച നടത്തിയിട്ടുണ്ട്.
അമേത്തി ലോക്‌സഭാ മണ്ഡലത്തില്‍ ഉള്‍പ്പെടുന്ന അഞ്ച് നിയമസഭാ മണ്ഡലത്തിലെയും പാര്‍ട്ടി നേതാക്കളുമായി ചര്‍ച്ച നടത്തിയശേഷം മൂന്നുദിവസങ്ങള്‍ക്കുള്ളില്‍ റിപ്പോര്‍ട്ട് കോണ്‍ഗ്രസ് നേതൃത്വത്തിന് സമര്‍പ്പിക്കുമെന്നാണ് വിവരം.
രാഹുല്‍ ഗാന്ധിയുടെ തെരഞ്ഞെടുപ്പ് പരാജയത്തിന്റെ ഉത്തരവാദിത്തം ഏറ്റെടുത്ത് അമേത്തി ജില്ലാ കമ്മിറ്റി അധ്യക്ഷന്‍ യോഗേന്ദ്ര മിശ്ര രാജിവയ്ക്കാന്‍ തീരുമാനിച്ചിരുന്നു.
അതേസമയം അമേത്തിയില്‍ പാര്‍ട്ടി പ്രവര്‍ത്തകരുമായി ചര്‍ച്ച നടത്തിയ സമിതി അംഗങ്ങള്‍ തെളിവെടുപ്പിന്റെ കാര്യങ്ങള്‍ സംബന്ധിച്ച് ഒന്നും പ്രതികരിക്കാന്‍ തയാറായില്ല.