പാലക്കാട്: തിരഞ്ഞെടുത്ത കുടുംബശ്രീ ഉത്പന്നങ്ങളുടെ പ്രൊഡക്ട് കാറ്റലോഗ് പുറത്തിറക്കി. പാലക്കാട് ജില്ലയിലെ കുടുംബശ്രീ സംരംഭകരുടെ കയറ്റുമതി ഗുണനിലവാരമുള്ള വൈവിദ്ധ്യങ്ങളായ ഉത്പന്നങ്ങളുടെ വിശദവിവരങ്ങളടങ്ങിയ കാറ്റലോഗ് ജില്ലാ പഞ്ചായത്ത് പ്രസിഡണ്ട് അഡ്വ.കെ.ശാന്തകുമാരി പ്രകാശനം ചെയ്തു. കുടുംബശ്രീ ഉത്പന്നങ്ങള്‍ വിപണിയുടെ സാധ്യമായിടത്തെല്ലാം എത്തിക്കാനുള്ള നൂതനമായ ശ്രമങ്ങളുടെ ഭാഗമായാണ് കുടുംബശ്രീ ജില്ലാ മിഷന്‍ പ്രൊഡക്ട് കാറ്റലോഗ് പുറത്തിറക്കിയത്. ഭക്ഷ്യ ഉത്പന്നങ്ങള്‍, കരകൗശല വസ്തുക്കള്‍, സൗന്ദര്യ വര്‍ദ്ധക ഉത്പന്നങ്ങള്‍, ആഭരണങ്ങള്‍ തുടങ്ങിയ മികച്ച ഉത്പന്നങ്ങളുടെ ചിത്രങ്ങളും വില നിലവാരവും സംരംഭകരുടെ വിലാസവുമടക്കം കാറ്റലോഗില്‍ ഉള്‍ക്കൊള്ളിച്ചിരിക്കുന്നു. ജില്ലാ മിഷന്‍ കോര്‍ഡിനേറ്റര്‍ പി.സൈതലവി, എസ്.വി.പ്രേംദാസ് പ്രകാശന ചടങ്ങില്‍ സംബന്ധിച്ചു.