തിരുവനന്തപുരം: ഐ.എ.എസ് തലപ്പത്ത് വന്‍ അഴിച്ചുപണി. കെ.എം.ആര്‍.എല്‍ മാനേജിങ് ഡയറക്ടര്‍ മുഹമ്മദ് ഹനീഷിനെ തല്‍സ്ഥാനത്തുനിന്ന് മാറ്റി വ്യവസായ വകുപ്പ് (പി.എസ്.യു) സെക്രട്ടറിയായി നിയമിക്കാന്‍ ഇന്നലെ ചേര്‍ന്ന മന്ത്രിസഭായോഗം തീരുമാനിച്ചു. സാംസ്‌കാരിക വകുപ്പ് സെക്രട്ടറി റാണി ജോര്‍ജിന് നിലവിലുള്ള ചുമതലകള്‍ക്കു പുറമെ കേരള സ്റ്റേറ്റ് കോ ഓപറേറ്റിവ് ബാങ്ക് മനേജിങ് ഡയറക്ടറുടെ ചുമതല കൂടി നല്‍കാനും പൊതുവിദ്യാഭ്യാസ സെക്രട്ടറി എ. ഷാജഹാന് നിലവിലുള്ള ചുമതലകള്‍ക്കു പുറമെ സൈനിക ക്ഷേമ വകുപ്പ്, പ്രിന്റിങ് ആന്‍ഡ് സ്റ്റേഷനറി എന്നിവയുടെ ചുമതല കൂടി നല്‍കാനും കൃഷിവകുപ്പ് സ്‌പെഷ്യല്‍ സെക്രട്ടറി ഡോ. രത്തന്‍ ഖേല്‍കര്‍ക്ക് കാര്‍ഷിക വികസന കര്‍ഷകക്ഷേമ വകുപ്പ് ഡയറക്ടറുടെ അധിക ചുമതല നല്‍കാനും മന്ത്രിസഭാ യോഗം തീരുമാനിച്ചു. ലാന്‍ഡ് ബോര്‍ഡ് സെക്രട്ടറി സി.എ ലതയെ ലാന്‍ഡ് റവന്യൂ കമ്മിഷനറായും ലാന്‍ഡ് റവന്യൂ ജോയിന്റ് കമ്മിഷനര്‍ യു.വി ജോസിനെ ലൈഫ് മിഷന്‍ ചീഫ് എക്‌സിക്യൂട്ടീവ് ഓഫിസറായും മാറ്റി നിയമിക്കാനും തീരുമാനിച്ചു. എറണാകുളം ജില്ലാ കലക്ടര്‍ മുഹമ്മദ് വൈ. സഫീറുല്ലയെ എസ്.ജി.എസ്.ടി വകുപ്പ് അഡീഷനല്‍ കമ്മിഷനറായി നിയമിച്ചു. കണ്ണൂര്‍ ജില്ലാ കലക്ടര്‍ മീര്‍ മുഹമ്മദ് അലിയെ ശുചിത്വമിഷന്‍ ഡയറക്ടറായും മലപ്പുറം ജില്ലാ കലക്ടര്‍ അമിത് മീണയെ അനര്‍ട്ട് ഡയറക്ടറായി മാറ്റി നിയമിക്കും.