കൂത്തുപറമ്പ്: മമ്പറം കീഴത്തൂര്‍ തൂക്കുപാലത്തിനു സമീപം വയലില്‍ വന്‍ തീപിടുത്തം. ഇന്നലെ രാവിലെ പത്തരയോടെയാണ് സംഭവം.
കീഴത്തൂര്‍ പാടശേഖരം ഉള്‍പ്പെടുന്ന ഇരുപത് ഏക്കര്‍ സ്ഥലത്താണ് തീ പടര്‍ന്നത്. ആദ്യം ചെറിയൊരു സ്ഥലത്തുണ്ടായ തീപിടിത്തം പെട്ടെന്നുതന്നെ ഇരുപത് ഏക്കറോളം വരുന്ന സ്ഥലത്തേക്ക് ആളിപ്പടരുകയായിരുന്നു. കൂത്തുപറമ്പ്, തലശ്ശേരി എന്നിവിടങ്ങളില്‍ നിന്നെത്തിയ ഫയര്‍ഫോഴ്‌സും നാട്ടുകാരും ചേര്‍ന്ന് നടത്തിയ പരിശ്രമത്തിനൊടുവില്‍ ഉച്ചയ്ക്ക് ഒരുമണിയോടെയാണ് തീ പൂര്‍ണമായും അണക്കാനായത്. തീപിടിത്തമുണ്ടായ സമയം അന്‍പതോളം തൊഴിലുറപ്പ് തൊഴിലാളികള്‍ വയലില്‍ ജോലിയിലേര്‍പ്പെട്ടിരുന്നു. തീ പടരുന്നത് കണ്ടതോടെ ഇവര്‍ ഓടി രക്ഷപ്പെട്ടു. കൂത്തുപറമ്പ് ഫയര്‍ ഫോഴ്‌സ് അസിസ്റ്റന്റ് സ്റ്റേഷന്‍ ഓഫിസര്‍ കെ.പി ബാലകൃഷ്ണന്‍, തലശേരി ഫയര്‍ഫോഴ്‌സ് ലീഡിങ് ഫയര്‍മാന്‍ സി.വി വിനോദ് കുമാര്‍ എന്നിവരുടെ നേതൃത്വത്തിലാണ് തീയണച്ചത്.