സ്വന്തം ലേഖകന്‍
തിരുവനന്തപുരം: എസ്.സി, എസ്.ടി വിഭാഗങ്ങള്‍ക്കെതിരായ അക്രമം തടയുന്നതിന് കൃത്യമായ നടപടിയെടുക്കുന്നതില്‍ സര്‍ക്കാര്‍ സംവിധാനങ്ങള്‍ പരാജയപ്പെടുന്നുവെന്ന് ഭരണ പരിഷ്‌കാര കമ്മിഷന്റെ വിമര്‍ശനം. ഇതു സംബന്ധിച്ച് സര്‍ക്കാരിന് സമര്‍പ്പിച്ച റിപ്പോര്‍ട്ടിലാണ് വി.എസ് അച്യുതാനന്ദന്‍ ചെയര്‍മാനായ ഭരണ പരിഷ്‌കാര കമ്മിഷന്‍ സര്‍ക്കാരിനെതിരേ വിമര്‍ശനം ഉന്നയിച്ചത്. കേരളത്തില്‍ എസ്.സി,എസ്.ടി അതിക്രമം തടയല്‍ നിയമത്തിന് കീഴിലുള്ള കേസുകളുടെ ശിക്ഷാനിരക്ക് വളരെ കുറവാണെന്നും റിപ്പോര്‍ട്ടില്‍ പറയുന്നു.
കേസുകള്‍ സംബന്ധിച്ച കണക്കുകളും റിപ്പോര്‍ട്ടില്‍ എടുത്തുപറയുന്നുണ്ട്. എസ്.സി വിഭാഗവുമായി ബന്ധപ്പെട്ട് 2018ല്‍ 1,583 കേസ് രജിസ്റ്റര്‍ ചെയ്തതില്‍ 608ല്‍ മാത്രമാണ് കുറ്റപത്രം സമര്‍പ്പിച്ചത്. എസ്.ടി വിഭാഗവുമായ.ി ബന്ധപ്പെട്ട് 283ല്‍ 175 കേസില്‍ മാത്രമാണ് കുറ്റപത്രം നല്‍കിയതെന്നും റിപ്പോര്‍ട്ടില്‍ ചൂണ്ടിക്കാട്ടുന്നു. ശാസ്ത്രീയവും ശക്തവുമായ അന്വേഷണം ഉറപ്പ് വരുത്തണമെന്നും കേസന്വേഷണം മെച്ചപ്പെടുത്തുന്നതിന് പൊലിസ് ഉദ്യോഗസ്ഥര്‍ക്ക് പരിശീലനം നല്‍കണമെന്നും റിപ്പോര്‍ട്ടില്‍ ശുപാര്‍ശ ചെയ്തിട്ടുണ്ട്.