തിരുവനന്തപുരം: തടവുകാരില്‍ നിന്ന് മൊബൈല്‍ ഫോണുകളും മറ്റും പിടികൂടിയ സാഹചര്യത്തില്‍ സുഖവാസ കേന്ദ്രമായി ജയിലുകള്‍ മാറുകയാണെന്ന് യു.ഡി.എഫ് ആരോപണം ശക്തമാക്കി. നിയമസഭയിലും ഇതു സംബന്ധിച്ച് ചോദ്യങ്ങളുയര്‍ന്ന സാഹചര്യത്തില്‍ ജയിലുകളില്‍ പരിശോധന ശക്തമാക്കാനും തീരുമാനിച്ചതായി മുഖ്യമന്ത്രി പിണറായി വിജയന്‍ പറഞ്ഞു.

ജയിലുകളില്‍ മൊബൈല്‍ ജാമറുകള്‍ സ്ഥാപിക്കുമെന്ന് അദ്ദേഹം വ്യക്തമാക്കി. ജയിലുകളിലെ അന്തരീക്ഷത്തിന് ചേരാത്ത ചില നടപടികള്‍ നടക്കുന്നുണ്ടെന്ന് പറഞ്ഞ മുഖ്യമന്ത്രി അത് കൊണ്ടാണ് പരിശോധന കര്‍ശനമാക്കിയതെന്നും നിയമസഭയെ അറിയിച്ചു.
കഴിഞ്ഞ ദിവസങ്ങളില്‍ കണ്ണൂര്‍, വിയ്യൂര്‍ സെന്‍ട്രല്‍ ജയിലുകളില്‍ നടത്തിയ മിന്നല്‍ പരിശോധനയില്‍ പ്രതികളുടെ കയ്യില്‍ നിന്ന് മൊബൈല്‍ ഫോണുകള്‍ കണ്ടെത്തിയിരുന്നു.

25ലധികം ഫോണുകള്‍ കണ്ണൂര്‍ ജയിലില്‍ നിന്ന് മാത്രം പിടിച്ചെടുത്തു. ഇതിന് പുറമേ കഞ്ചാവ്, പുകയില, പണം, സിം കാര്‍ഡ്, ചിരവ, ബാറ്ററികള്‍, റേഡിയോ എന്നിവയും ജയിലില്‍ നിന്ന് പിടിച്ചിരുന്നു. ടി.പി വധക്കേസ് പ്രതികളടക്കമുള്ളവരുടെ അടുത്ത് നിന്നായിരുന്നു ഫോണുകള്‍ പിടിച്ചെടുത്തത്.

ചില തടവുകാരെ ജയില്‍ മാറ്റിയിട്ടുണ്ട്. ഉത്തരവാദികളായ ഉദ്യോഗസ്ഥര്‍ക്കെതിരേ നടപടി സ്വീകരിക്കും. ജയില്‍ ഗേറ്റുകളില്‍ സുരക്ഷക്കായി സ്‌കോര്‍പ്പിയോണ്‍ സംഘത്തെ നിയോഗിക്കുമെന്നും മുഖ്യമന്ത്രി അറിയിച്ചു. ജയിലുകള്‍ സുഖവാസ കേന്ദ്രങ്ങളാകുന്നുവെന്ന കെ.സി ജോസഫിന്റെ പരാമര്‍ശത്തിനുള്ള മറുപടിയായാണ് മുഖ്യമന്ത്രി ജയിലുകളില്‍ ജാമറുകള്‍ ഘടിപ്പിക്കുമെന്നും പരിശോധന ശക്തമാക്കുമെന്നും അറിയിച്ചത്.