കമ്പളക്കാട്: ഇന്നലെയുണ്ടായ ശക്തമായ മഴയിലും കാറ്റിലും മിന്നലിലും കമ്പളക്കാട് പ്രദേശത്ത് വ്യാപകനാശം. ഒന്നാംമൈലിലെ പട്ടത്ത് നാസറിന്റെ വീടിന് മുകളിലേക്ക് അയിനി മരം കടപുഴകി വീണ് വീട് ഭാഗികമായി തകര്‍ന്നു. മേല്‍ക്കൂരയും ചുമരും തകര്‍ന്നിട്ടുണ്ട്. സംഭവ സമയത്ത് നാസറിന്റെ മാതാവ് മാത്രമാണ് വീട്ടിലുണ്ടായിരുന്നത്. അമ്പലച്ചാലിലെ എടപ്പാള സൈനുദ്ദീന്‍ മുസ്‌ലിയാരുടെ വീടിന് മുകളിലെ ഷീറ്റുകള്‍ കാറ്റില്‍ പറന്നുവീണു. പലയിടങ്ങളിലും കൃഷികളും നിലംപൊത്തിയിട്ടുണ്ട്. വൈകിട്ട് മൂന്നോടെ ആരംഭിച്ച മഴയും കാറ്റും നാല് മണിക്കൂറോളം നീണ്ടുനിന്നു.