കിളിമാനൂര്‍: പള്ളിക്കല്‍ മുതല വില്ലേജ് ഓഫിസിന് പുറകിലായി കുപ്പോട്ട് ഏലായില്‍ ടവര്‍ സ്ഥാപിക്കുന്നതിനെതിരേ പ്രതിഷേധം ശക്തമാകുന്നു. കുപ്പോട്ട് പുത്തന്‍വീട്ടില്‍ മോഹനന്‍ പിള്ളയുടെ വസ്തുവില്‍ ആണ് ടവര്‍ സ്ഥാപിക്കുന്നതിന് ഒരുങ്ങുന്നത്.
ടവറിനെതിരേ കഴിഞ്ഞ ദിവസം  നടന്ന ജനകീയ സമരം അഡ്വ. വി. ജോയി എം.എല്‍.എ  ഉദ്ഘാടനം ചെയ്തു. ഇവിടെ ആട് ഫാം തുടങ്ങുന്നു എന്ന വ്യാജേന പനപ്പള്ളി ഏലായില്‍ ഒരേക്കറോളം കുന്ന് കരഭാഗം ഇടിച്ചു നിരത്തിയത് വ്യാപക പ്രതിഷേധത്തിനിടയാക്കിയിരുന്നു. ടവറിനെതിരേ വില്ലേജ് ഓഫിസിനു മുന്നില്‍ നടന്ന പ്രതിഷേധ സമരത്തില്‍ സ്ത്രീകളടക്കം നിരവധി നാട്ടുകാരും വിവിധ രാഷ്ട്രീയ പാര്‍ട്ടി പ്രതിനിധികളും പങ്കെടുത്തു.
വാര്‍ഡ് മെംബര്‍ പള്ളിക്കല്‍ നസീര്‍, സി.പി.എം ലോക്കല്‍ സെക്രട്ടറി സജീബ് ഹാഷിം, ബി.ജെ.പി നേതാവ് മുരളീധരന്‍ പിള്ള, സി.പി.ഐ ലോക്കല്‍ സെക്രട്ടറി രവീന്ദ്രന്‍ പിള്ള, എസ്.എസ് ബിജു പങ്കെടുത്തു.