ലീഡ്‌സ്: ആവേശം അവസാന ഓവര്‍ വരെ നീണ്ട മത്സരത്തില്‍ അഫ്ഗാനിസ്ഥാനെ മൂന്ന് വിക്കറ്റിന് പരാജയപ്പെടുത്തി പാകിസ്താന്‍ സെമിസാധ്യത നിലനിര്‍ത്തി. അഫ്ഗാനിസ്ഥാന്‍ ഉയര്‍ത്തിയ 228 റണ്‍സ് വിജയലക്ഷ്യം 49.4 ഓവറില്‍ ഏഴ് വിക്കറ്റ് നഷ്ടപ്പെടുത്തി പാകിസ്താന്‍ മറികടന്നു. ക്യാപ്റ്റന്‍ ഗുലാബ്ദിന്‍ നൈബ് എറിഞ്ഞ അവസാന ഓവറില്‍ ആറ് റണ്‍സ് വേണ്ടിയിരുന്ന പാകിസ്താന്‍ രണ്ട് പന്ത് ബാക്കി നിര്‍ത്തിയാണ് ലക്ഷ്യത്തിലെത്തിയത്. നാലാം പന്ത് ബൗണ്ടറി കടത്തിയ ഇമാദ് വാസിം ആണ് പാകിസ്താന്റെ വിജയശില്‍പി. 49 റണ്‍സും രണ്ട് വിക്കറ്റും സ്വന്തമാക്കിയ ഇമാദ് വസിം ആണ് കളിയിലെ താരം.

ടോസ് നേടി ബാറ്റിങ് തിരഞ്ഞെടുത്ത അഫ്ഗാനിസ്ഥാന്റെ തുടക്കം തന്നെ തകര്‍ച്ചയോടെയായിരുന്നു. ഷഹീന്‍ അഫ്രീദി എറിഞ്ഞ അഞ്ചാം ഓവറില്‍ ഗുലാബ്ദിന്‍ നൈബിനെയും ഹസ്മത്തുള്ള ഷാഹിദിയെയും നഷ്ടമായ അഫ്ഗാനിസ്ഥാന് അസ്ഗര്‍ അഫ്ഗാന്‍ (42), നജിബുള്ള സദ്രാന്‍ (42), റഹ്മത്ത് ഷാ (35) എന്നിവരുടെ ഇന്നിങ്‌സാണ് തുണയായത്. നാല് വിക്കറ്റ് വീഴ്ത്തിയ ഷഹീന്‍ അഫ്രീദിയാണ് അഫ്ഗാനിസ്ഥാന്‍ മുന്നേറ്റത്തിന് വിലങ്ങിട്ടത്.

പാകിസ്താന് വേണ്ടി ബാബര്‍ അസം (45), ഇമാമുല്‍ ഹഖ് (36) എന്നിവര്‍ ഭേദപ്പെട്ട പ്രകടനം പുറത്തെടുത്തു. അഫ്ഗാനിസ്ഥാന് വേണ്ടി മുഹമ്മദ് നബിയും മുജീബുര്‍ റഹ്മാനും രണ്ട് വിക്കറ്റ് വീഴ്ത്തി. ജയത്തോടെ പാകിസ്താന്‍ ഇംഗ്ലണ്ടിനെ പിന്തള്ളി പട്ടികയില്‍ നാലാമതെത്തി. എട്ടു മത്സരത്തില്‍ നിന്ന് ഒന്‍പത് പോയിന്റാണ് പാകിസ്താന്റെ സമ്പാദ്യം.