തളിപ്പറമ്പ്: പരിയാരം മെഡിക്കല്‍ കോളജ് വനിതാ ഹോസ്റ്റല്‍ മെസില്‍ വന്‍ തീപിടിത്തം. രണ്ട് ഗ്യാസ് സിലിണ്ടറുകള്‍ പൊട്ടിത്തെറിച്ചു. ഇന്നലെ പുലര്‍ച്ചെ 4.30ഓടെയാണ് സംഭവം.
മെസിനു സമീപമുള്ള മുറിയില്‍ ഉറങ്ങുകയായിരുന്ന ജീവനക്കാരികള്‍ ഉണര്‍ന്നതോടെയാണ് സംഭവം ശ്രദ്ധയില്‍പെട്ടത്. ദുര്‍ഗന്ധവും പുകയും അനുഭവപ്പെട്ടതോടെ സെക്യൂരിറ്റി ജീവനക്കാരെ വിവരമറിയിക്കുകയായിരുന്നു.
തുടര്‍ന്ന് ഹോസ്റ്റലില്‍ ഉണ്ടായിരുന്ന നൂറോളം വിദ്യാര്‍ഥികളെ വിളിച്ചുണര്‍ത്തി പുറത്തെത്തിക്കുകയായിരുന്നു. ഇവര്‍ പുറത്തിറങ്ങി നിമിഷങ്ങള്‍ക്കകമാണ് സ്‌ഫോടനം നടന്നത്.
അടുക്കളയില്‍ സൂക്ഷിച്ച രണ്ട് ഗ്യാസ് സിലിണ്ടറും ഉഗ്ര ശബ്ദത്തില്‍ പൊട്ടിത്തെറിക്കുകയായിരുന്നു.
വിവരമറിഞ്ഞ് തളിപ്പറമ്പില്‍ നിന്നും പയ്യന്നൂരില്‍ നിന്നുമായി മൂന്ന് യൂനിറ്റ്  അഗ്‌നിശമനസേനയെത്തി രണ്ട് മണിക്കൂറോളം പരിശ്രമിച്ചാണ് അഗ്നിബാധ നിയന്ത്രണ വിധേയമാക്കിയത്.
മെസ് ഹാളിലെ ഫ്രിഡ്ജില്‍ നിന്നുണ്ടായ ഷോര്‍ട്ട് സര്‍ക്യൂട്ടാണ് അപകടത്തിനു കാരണമെന്ന് കരുതുന്നു. സ്‌ഫോടനത്തില്‍ മെസ് ഹാള്‍ പൂര്‍ണമായും തകര്‍ന്നു.
ഔദ്യോഗിക പരിപാടികളുടെ ഭാഗമായി ജില്ലയിലെത്തിയ മന്ത്രി പ്രൊഫ. സി രവീന്ദ്രനാഥ്, ടി.വി രാജേഷ് എം.എല്‍.എ തുടങ്ങിയവര്‍ സ്ഥലം സന്ദര്‍ശിച്ചു.