ന്യൂഡല്‍ഹി: പത്രങ്ങള്‍ അച്ചടിക്കുന്ന വിവിധ ഇനം ന്യൂസ്പ്രിന്റുകള്‍ക്കും മാസികകള്‍ അച്ചടിക്കുന്ന വിവിധയിനം കടലാസുകള്‍ക്കും പത്തുശതമാനം ഇറക്കുമതി തീരുവ ചുമത്തി. ഇന്നലെ ധനമന്ത്രി നിര്‍മല സീതാരാമന്‍ അവതരിപ്പിച്ച രണ്ടാം മോദി സര്‍ക്കാരിന്റെ കന്നി ബജറ്റിലാണ് രാജ്യത്തെ അച്ചടി മാധ്യമരംഗത്തെ തകര്‍ക്കുന്ന വിധത്തിലുള്ള നിര്‍ദേശമുള്ളത്. ന്യൂസ്പ്രിന്റ്, അച്ചടിക്കു വേണ്ടി ഉപയോഗിക്കുന്ന അണ്‍കോട്ടഡ് പേപ്പര്‍, മാസികകള്‍ക്കുപയോഗിക്കുന്ന കനംകുറഞ്ഞ കോട്ടഡ് പേപ്പര്‍ എന്നിവയ്ക്കാണ് തീരുവ ചുമത്തിയിരിക്കുന്നത്. അച്ചടിച്ച പുസ്തകങ്ങള്‍ക്ക് അഞ്ചുശതമാനം അധികനികുതിയും ചുമത്തിയിട്ടുണ്ട്.

ന്യൂസ്പ്രിന്റിന് ഇതുവരെ ഇറക്കുമതി തീരുവ ഉണ്ടായിരുന്നില്ല. ഈ സാഹചര്യത്തില്‍ ഒറ്റയടിക്ക് പത്ത് ശതമാനം തീരുവ ചുമത്തുന്നത് പത്രങ്ങളുടെ അച്ചടിചെലവ് കുത്തനെ കൂടാനും അതുവഴി പത്രങ്ങളുടെ വലവര്‍ധിക്കാനും കാരണമാവും. തദ്ദേശീയമായി ഉല്‍പ്പാദിപ്പിക്കുന്ന ന്യൂസ്പ്രിന്റുകളുടെ ഉയര്‍ന്ന വിലയും ഗുണനിലവാരമില്ലായ്മയും കാരണം കേരളത്തിലുള്‍പ്പെടെ അച്ചടിക്കുന്ന ഏതാണ്ടെല്ലാ പത്രങ്ങളും ഇറക്കുമതി ചെയ്യുന്ന ന്യൂസ്പ്രിന്റാണ് ഉപയോഗിക്കുന്നത്. ആഭ്യന്തര വ്യവസായം വര്‍ധിപ്പിക്കാനാണ് ഇറക്കുമതിചെയ്യുന്ന ന്യൂസ്പ്രിന്റുകള്‍ക്ക് തീരുവ ചുമത്തിയതെന്നാണ് കേന്ദ്രസര്‍ക്കാരിന്റെ ന്യായം.

അതേസമയം, ന്യൂസ്പ്രിന്റിനു പത്തുശതമാനം ഇറക്കുമതിത്തീരുവ ഏര്‍പ്പെടുത്തിയത് പത്രവ്യവസായത്തെ ബാധിക്കുമെന്ന് ഇന്ത്യന്‍ ന്യൂസ് പേപ്പര്‍ സൊസൈറ്റി (ഐ.എന്‍.എസ്) റീജ്യനല്‍ ചെയര്‍മാന്‍ എം.വി ശ്രേയാംസ്‌കുമാര്‍ പറഞ്ഞു. മൊത്തത്തിലുള്ള സാമ്പത്തികമാന്ദ്യവും പരസ്യങ്ങളിലുള്ള കുറവും പത്രവ്യവസായത്തെ ബാധിച്ചിട്ടുണ്ടെന്നും ഈ സാഹചര്യത്തില്‍ ന്യൂസ്പ്രിന്റിനുമേല്‍ ഇറക്കുമതിത്തീരുവ കൂടി ചുമത്തുന്നത് പത്ര, പ്രസിദ്ധീകരണ മേഖലയെ പ്രതിസന്ധിയിലാക്കുമെന്നും എം.പി വീരേന്ദ്രകുമാറും അഭിപ്രായപ്പെട്ടു.

Budget 2019-20: Govt. slaps 10% customs duty on newsprint