തിരുവനന്തപുരം: ഇന്നലെ പുല്ലുവിളയില്‍ തെരുവ് നായ്ക്കളുടെ കടിയേറ്റ് കൊല്ലപ്പെട്ട ജോസ്‌ക്ലിന്റെ മൃതദേഹം സംസ്‌കരിച്ചു. തെരുവ് നായ ശല്യം പരിഹരിക്കാന്‍ ശാശ്വതമായ നടപടിയെടുക്കാതെ മൃതദേഹം സംസ്‌കരിക്കില്ലെന്ന് ബന്ധുക്കള്‍ പറഞ്ഞിരുന്നു. ഇന്ന് രാവിലെ മുതല്‍ മൃതദേഹവുമായി നാട്ടുകാരും ബന്ധുക്കളും റോഡ് ഉപരോധിച്ചിരുന്നു. തുടര്‍ന്ന് കലക്റ്ററുമായി നടത്തിയ ചര്‍ച്ചയിലാണ് പ്രശ്‌നത്തിന് പൂര്‍ണമായി പരിഹാരമുണ്ടാക്കാന്‍ ധാരണയായത്.

പ്രദേശത്തെ മാലിന്യം പൂര്‍ണമായി നീക്കം ചെയ്യും, തെരുവ് നായ്ക്കളെ ജീവന് ഭീഷണിയുള്ളതായി പ്രഖ്യാപിച്ച് കൊന്നൊടുക്കുകയോ വന്ധ്യംകരണം നടത്തുകയോ ചെയ്യും,ജോസ്‌ക്ലിന്റെ കുടുംബത്തിന് മാന്യമായ നഷ്ടപരിഹാരം നല്‍കും എന്നിവയാണ് കലക്റ്ററുമായി നാട്ടുകാര്‍ നടത്തിയ ചര്‍ച്ചയില്‍ തീരുമാനമായത്.

ഞായറാഴ്ച രാത്രിയാണ് പുല്ലുവിളയില്‍ ജോസ്‌ക്ലിന്‍ നായ്ക്കളുടെ ആക്രമത്തിനിരയായത്. ഇന്നസലെ രാവിലെ മെഡിക്കല്‍ കോളജില്‍ വച്ചായിരുന്നു മരിച്ചത്.